శ్రీవారికి సమర్పించిన వజ్ర కిరీటంపై గాలి పేరు

తిరుమల: గనుల అక్రమ తవ్వకాల కేసులో హైదరాబాదులోని జైలులో మగ్గుతున్న కర్ణాటక మాజీ మంత్రి గాలి జనార్దన్ రెడ్డి తాను చేసిన పనికి చింతిస్తూ ఉండవచ్చు. తిరుమల శ్రీవారికి ఆయన సమర్పించిన 45 కోట్ల రూపాయల విలువ చేసే వజ్ర కిరీటం గురించి అందిరకీ తెలిసిందే. రెండున్నరేళ్ల క్రితం సమర్పించిన ఈ వజ్ర కిరీటంపై గాలి జనార్దన్ రెడ్డి తన పేరును చెక్కించుకున్నారట. సాధారణంగా భక్తులెవరూ తాము శ్రీవారికి సమర్పించే బహుమతులపై తమ పేర్లను చెక్కించుకోరు. కానీ గాలి జనార్దన్ రెడ్డి సంప్రదాయానికి విరుద్ధంగా వ్యవహరించారని అంటున్నారు.

తాము ప్రదానం చేసే బహుమతిపై తమ పేర్లను రాసుకుంటే దేవుడికి ఆగ్రహం కలుగుతుందని సాధారణంగా భక్తులు భయపడుతూ ఉంటారు. ఆలా పేరు చెక్కించకోకూడదని టిటిడి మాజీ అధికారి ఒకరు ఇచ్చిన సలహాను గాలి జనార్దన్ రెడ్డి తోసిపుచ్చారట. రెండేళ్ల క్రితం గాలి జనార్దన్ రెడ్డికి కష్టాలు ప్రారంభమయ్యాయి. దాంతో గత డిసెంబర్‌లో వైకుంఠ ఏకాదశి పర్వదినం ముగిసిన తర్వాత తన శ్రేయోభిలాషుల సూచన మేరకు వజ్ర కిరీటంపై తన పేరును చెరిపేయాలని జనార్దన్ రెడ్డి కోరారని అంటున్నారు. నిరుడు జూన్‌లో కూడా ఆయన మరోసారి టిటిడి అధికారులను కోరినట్లు తెలుస్తోంది. అలా చెరిపేయడం అసాధారణమైన చర్య అని, అంతేకాకుండా దానికి చాలా సమయం పడుతుందని సంబంధిత అధికారులు చెప్పినట్లు సమాచారం. ఈలోగా సెప్టెంబర్ 5వ తేదీ గాలి జనార్దన్ రెడ్డి అరెస్టయ్యారు.

English summary

There are so many diamonds on the crown that it is difficult to count them. Hoping to keep his tryst with immortality, Gali Janardhan Reddy had his name inscribed on the inside of the crown.