పరకాలపై టిఆర్ఎస్ దాడి: ఆంధ్రజ్యోతి వద్ద ఉద్రిక్తత

By Srinivas

Published: Sunday, November 13, 2011, 15:44 [IST]

హైదరాబాద్: తెలంగాణ రాష్ట్ర సమితి సీనియర్ నేత చంద్రశేఖర రావు, విశాలాంధ్ర మహాసభ నేత పరకాల ప్రభాకర్ వర్గం మధ్య ఘర్షణ చోటు చేసుకోవడంతో ఆదివారం ఎబిఎన్ ఆంధ్రజ్యోతి కార్యాలయం వద్ద తీవ్ర ఉద్రిక్త పరిస్థితులు ఏర్పడ్డాయి. పరిస్థితి చేయిదాటుతుందని భావించిన పోలీసులు చంద్రశేఖర రావు, పరకాల ప్రభాకర్‌ను అరెస్టు చేసి తీసుకు వెళ్లారు. కాగా అంతకుముందు రోజు రాత్రి జరిగిన చర్చా కార్యక్రమంలో తెలంగాణలో విశాలాంధ్ర వాదన ఉందని తనకు రక్షణ కల్పిస్తే దానిని ఒప్పించి నిరూపిస్తానని విశాలాంధ్ర నేత పరకాల ప్రభాకర్ సవాల్ విసిరారు. దానికి టిఆర్ఎస్ నేత చంద్రశేఖర రావు స్పందిస్తూ తాను రక్షణ కల్పిస్తానని వికారాబాద్ వద్ద చర్చకు రావాలని ప్రతి సవాల్ విసిరారు. ఈ నేపథ్యంలో ఇరువురు నేతలు ఆదివారం మధ్యాహ్నం ఎబిఎన్ ఆంధ్రజ్యోతి కార్యాలయానికి చేరుకున్నారు.

ఇరువురు ఇలాంటి చర్చా వేదికను రద్దు చేసుకోవాలని పోలీసులు విజ్ఞప్తి చేశారు. ఇలాంటి చర్చలు ఏర్పాటు చేస్తే పరిస్థితులు మరింత ఉద్రిక్తంగా మారతాయని వారికి చెప్పారు. ఎబిఎన్ ఆంధ్రజ్యోతి ఎండి రాధాకృష్ణ కూడా వారికి నచ్చజెప్పే ప్రయత్నాలు చేశారు. అయినప్పటికీ వారు వికారాబాద్ బయలుదేరేందుకు ఎబిఎన్ కార్యాలయానికి వచ్చారు. చంద్రశేఖర్ మాట్లాడుతూ తాను పరకాలకు ఒక్కరికే రక్షణ కల్పిస్తానని మిగతా వారికి కల్పించలేనని చెప్పారు. అయితే పరకాల తనతో మరో నలుగురైదుగురు వస్తారని వారికి కూడా రక్షణ కల్పించాలని కోరారు. ఈ విషయమై మాట్లాడుకుంటుండగా మాటా మాట పెరిగి ఘర్షణకు దారి తీసింది. పోలీసులు ఇరువర్గాలకు నచ్చజెప్పే ప్రయత్నాలు చేశారు. అయితే కొందరు టిఆర్ఎస్ నేతలు పరకాలపై దాడి చేశారని తెలుస్తోంది. పరిస్థితి చేయిదాటుతుందని భావించిన పోలీసులు పరకాలను, చంద్రశేఖర్‌ను అరెస్టు చేసి పోలీసు స్టేషన్ తరలించారు. పరకాలపై దాడిని సీమాంధ్ర నేతలు, ఆంధ్రా మేథావుల సంఘం ఖండించింది.

Published On November 13, 2011