అప్పుడే చెప్పలేం, చర్చల తర్వాతే: తెలంగాణపై ఆజాద్

By Pratap

Published: Monday, November 14, 2011, 19:18 [IST]

న్యూఢిల్లీ: తెలంగాణపై నిర్ణయాన్ని అప్పుడే చెప్పలేమని కాంగ్రెసు ఆంధ్రప్రదేశ్ వ్యవహారాల ఇంచార్జీ గులాం నబీ ఆజాద్ అన్నారు. తెలంగాణపై చర్చల ప్రక్రియ ఇంకా కొనసాగుతోందని, అప్పుడే నిర్ణయం చెప్పలేమని ఆయన సోమవారం మీడియా ప్రతినిధులతో అన్నారు. తెలంగాణపై రెండో ఎస్సార్సీ వేయాలనే నిర్ణయం ఇంకా జరగలేదని ఆయన అన్నారు. తెలంగాణపై పార్టీ కోర్ కమిటీలో సోమవారం చర్చ జరిగిందని ఆయన చెప్పారు. చర్చల్లో పురోగతి కనిపించిందని, అయితే ఆ వివరాలను ఇప్పుడు వెల్లడించలేమని ఆయన అన్నారు. సంప్రదింపుల ప్రక్రియ పూర్తయిన తర్వాతనే తెలంగాణపై నిర్ణయం వెలువడుతుందని ఆయన అన్నారు. తెలంగాణపై యుపిఎ సమావేశం ఎప్పుడు జరుగుతుందనేది ఇప్పుడే చెప్పలేమని ఆయన అన్నారు.

కాంగ్రెసు కోర్ కమిటీ సోమవారం ఉదయం సమావేశమైంది. ఈ సమావేశానికి ఆజాద్ కూడా హాజరయ్యారు. తెలంగాణపై, ఉత్తర ప్రదేశ్ రాష్ట్ర శాసనసభ ఎన్నికలపై, తాజా రాజకీయ పరిణామాలపై కోర్ కమిటీ సమావేశంలో చర్చ జరిగింది. అయితే, తెలంగాణపై చర్చలు ఓ కొలిక్కి రాలేదని తెలుస్తోంది. కోర్ కమిటీ సమావేశానంతరం గులాం నబీ ఆజాద్ కాంగ్రెసు పార్టీ అధ్యక్షురాలు సోనియా గాంధీతో సమావేశమయ్యారు. తెలంగాణ నాయకులు రెండో ఎస్సార్పీని వ్యతిరేకిస్తున్న స్థితిలో ఏం చేయాలనే విషయంపై ఆజాద్ సోనియాతో మాట్లాడినట్లు తెలుస్తోంది.

Published On November 14, 2011