ఆ విషయం వదిలేయండి: అమెరికా ఘటనపై కలాం

By Srinivas

Published: Monday, November 14, 2011, 16:39 [IST]

కోల్‌కతా: అమెరికా భద్రతా అధికారులు తన పట్ల వ్యవహరించిన తీరుపై మాజీ రాష్ట్రపతి అబ్దుల్ కలాం సోమవారం హుందాగా స్పందించారు. అక్కడి అధికారులు తన పట్ల వ్యవహరించిన తీరు మరిచి పోవాలని అది మాట్లాడుకునేంత పెద్ద విషయమేమీ కాదని దానిని వదిలేయాలని కలాం సోమవారం ఉదయం కోల్‌కతాలో ఓ కార్యక్రమానికి హాజరైన సందర్భంలో చెప్పారు. కాగా గత సెప్టెంబర్ 29వ తేదిన కలాం అమెరికాలో ఓ కార్యక్రమానికి హాజరై తిరుగు ప్రయాణమైన సమయంలో న్యూయార్క్ విమానాశ్రయ సిబ్బంది అవమానపర్చిన విషయం తెలిసిందే. ఆయన బూట్లు, కోటు విప్పి చెక్ చేశారు. దీనిపై మన దేశంలో తీవ్ర నిరసనలు వెల్లువెత్తిన విషయం తెలిసిందే.

విదేశాంగ శాఖ మంత్రి ఎస్ఎం కృష్ణ అమెరికాలోని మన రాయబారికి ఈ వ్యవహారంపై అక్కడి ప్రభుత్వానికి లేఖ రాయాలని ఆదేశించారు. దీనిపై అనంతరం అమెరికా రాతపూర్వకంగా క్షమాపణలు చెప్పింది. ఇలాంటి ఘటనలు పునరావృతం కాకుండా చూస్తామని చెప్పింది. అయితే కలాంకు జరిగిన అవమానంపై భారతీయ జనతా పార్టీ, లెఫ్ట్ పార్టీలు తీవ్రస్థాయిలో విరుచుకు పడ్డాయి. గతంలోనూ ఇలాగే అవమానించారని మనమూ అమెరికా ప్రముఖులు వచ్చినప్పుడు ఇలాగే చేయాలని కేంద్ర ప్రభుత్వాన్ని కోరారు.

Published On November 14, 2011