పేదలకు ఇళ్లు లేవు, కానీ జగన్‌కు ప్యాలెస్: బాబు

విజయనగరం: పేదలకు ఇళ్లు లేవు గానీ వైయస్సా కాంగ్రెసు పార్టీ అధ్యక్షుడు వైయస్ జగన్మోహన్ రెడ్డి, కర్ణాటక మాజీ మంత్రి గాలి జనార్దన్ రెడ్డి ప్యాలెస్‌లు నిర్మించుకున్నారని తెలుగుదేశం పార్టీ అధ్యక్షుడు నారా చంద్రబాబు నాయుడు వ్యాఖ్యానించారు. విజయనగరం జిల్లాలో ఆయన సోమవారం స్వర్గీయ ఎన్టీ రామారావు విగ్రహానికి పూలమాల వేసి నివాళులు అర్పించిన అనంతరం రైతు పోరు బాటను ప్రారంభించారు. రైతులను పట్టించుకోవడం లేదంటూ రాష్ట్ర ప్రభుత్వంపై ఆయన విరుచుకుపడ్డారు. వ్యవసాయం లాభసాటి కావాలని, అందుకు స్వామినాథన్ కమిటీ సిఫార్సులను అమలు చేయాల్సిన అవసరం ఉంటుందని ఆయన అన్నారు.

రైతు అజెండా జాతీయ అజెండాగా మారాలని ఆయన అభిప్రాయపడ్డారు. వ్యవసాయంలో 50 శాతం లాభాలు వస్తేనే రైతుకు మనుగడ ఉంటుందని ఆయన అన్నారు. రూపాయికి బియ్యం పథకం వల్ల ఒక్కో వ్యక్తికి కేవలం 4 రూపాయల ప్రయోజనం మాత్రమే చేకూరుతుందని ఆయన అన్నారు. నిత్యావసర సరుకుల ధరలను నియంత్రించలేని చేతగాని ప్రభుత్వం ఉందని ఆయన వ్యాఖ్యానించారు.

English summary

TDP president N Chandrababu said that poor have no shelter, but YSR Congress president and Karnataka former minister Gali Janardhan reddy are having palaces.