ఎస్సార్సీపై కేంద్రం ఆచితూచి నిర్ణయిస్తుంది: పురంధేశ్వరి

విశాఖపట్నం: ప్రత్యేక రాష్ట్ర ఆందోళన నేపథ్యంలో రెండో ఎస్సార్సీ విషయంలో కేంద్ర ప్రభుత్వం అన్ని విషయాలను పరిగణలోకి తీసుకొని ఆచితూచి నిర్ణయిస్తుందని కేంద్ర సహాయ మంత్రి దగ్గుపాటి పురంధేశ్వరి సోమవారం విశాఖ జిల్లాలో అన్నారు. భారత దేశం ప్రజాస్వామ్య దేశమని ఈ దేశంలో ఎవరి వాదనలు వారికి ఉంటాయని ఆమె స్పష్టం చేశారు. రాష్ట్రంలో నెలకొన్న అనిశ్చితి దృష్ట్యా కేంద్రం ప్రతి విషయంలో ఆలోచించి నిర్ణయం తీసుకుంటుందన్నారు.

కేంద్రం రెండో ఎస్సార్సీ నియమిస్తున్నట్లు జరుగుతున్న ప్రచారంలో ఎలాంటి వాస్తవం లేదన్నారు. అధిష్టానం రాష్ట్రంలోని పరిస్థితులను ఎప్పటికప్పుడు తెలుసుకుంటోందన్నారు. పార్టీలో ఉన్నప్పుడు క్రమశిక్షణ చాలా అవసరమన్నారు. క్రమశిక్షణ ఉల్లంఘించిన వారిపై పార్టీ చర్యలు తీసుకుంటుందన్నారు. కాంగ్రెసు పటిష్టంగా ఉండాలంటే ప్రతి ఒక్కరిలోనూ క్రమశిక్షణ ఉండాల్సిందేనన్నారు.

English summary

Union Minister Purandeswari said today that central government will decide on second src after learn about state position.