రాజీనామా చేసిన నేతలకు ఒక్కొక్కరిగా స్పీకర్ పిలుపు

By Srinivas

Published: Monday, November 14, 2011, 11:04 [IST]

హైదరాబాద్: రాజీనామాలు ఉద్దేశ్య పూర్వకంగానే ఆమోదించడం లేదంటూ వస్తున్న విమర్శల నేపథ్యంలో స్పీకర్ నాదెండ్ల మనోహర్ ఇటు తెలంగాణ కోసం, అటు వైయస్సార్ కాంగ్రెసు పార్టీ అధ్యక్షుడు, కడప పార్లమెటు సభ్యుడు వైయస్ జగన్మోహన్ రెడ్డి వర్గం శాసనసభ్యుల రాజీనామాలపై నిర్ణయం తీసుకునే పనిలో పడినట్లుగా కనిపిస్తోంది. రెండు రోజుల క్రితం తెలంగాణ నగారా సమితి అధ్యక్షుడు నాగం జనార్ధన్ రెడ్డి, జగన్ వర్గం టిడిపి నేత నల్లపురెడ్డి ప్రసన్న కుమార్ రెడ్డి రాజీనామాలు ఆమోదించిన స్పీకర్ సోమవారం తెలంగాణ కోసం రాజీనామా చేసిన కామారెడ్డి ఎమ్మెల్యే గంపా గోవర్ధన్‌కు మంగళవారం స్పీకర్ ఎదుట హాజరు కావాలని ఆదేశాలు జారీ చేసింది.

అసెంబ్లీ కార్యదర్శి గంపా గోవర్ధన్‌కు ఫోన్ ద్వారా ఈ విషయాన్ని తెలియజేశారు. మరో ఎమ్మెల్యే జోగు రామన్నను కూడా తమ ముందు హాజరు కావాలని స్పీకర్ కార్యాలయం ఫోన్ ద్వారా తెలియజేయాలనుకున్నప్పటికీ ఆయన అందుబాటులో లేరని సమాచారం. ఫోన్ లైన్లోకి వస్తే ఆయనను కూడా మంగళవారం హాజరు కావాలని ఆదేశించే అవకాశముంది. ఆ తర్వాత జగన్ వర్గ ఎమ్మెల్యేల రాజీనామాల పైనా నిర్ణయం తీసుకోవాలని నాదెండ్ల భావిస్తున్నట్టుగా సమాచారం.

Published On November 14, 2011