రెండో ఎస్సార్సీ మంచిది: తెలంగాణపై మంత్రి పురంధేశ్వరి

By Pratap

Published: Tuesday, November 15, 2011, 8:26 [IST]

న్యూఢిల్లీ: తెలంగాణపై రెండో రాష్ట్రాల పునర్వ్యస్థీకరణ కమిషన్ (రెండో ఎస్సార్సీ) వేయడం మంచిదనే అభిప్రాయాన్ని కేంద్ర మంత్రి దగ్గుబాటి పురంధేశ్వరి వ్యక్తం చేశారు. దేశ శ్రేయస్సు, విదర్భ, గూర్ఖాల్యాండ్, ఉత్తరప్రదేశ్ విభజనలాంటి వాదనలను దృష్టిలో ఉంచుకుని రెండో ఎస్సార్సీ వేయడమే మేలనేది అందరి వాదన అని ఆమె అన్నారు. భారత అంతర్జాతీయ వాణిజ్యమేళాలో ఆంధ్రప్రదేశ్ మండపం ప్రారంభోత్సవ కార్యక్రమంలో ఆమె సోమవారం మాట్లాడారు. ప్రస్తుత అనిశ్చిత పరిస్థితిలో రాష్ట్రంలోకి పెట్టుబడులు రాక అభివృద్ధి కుంటుపడుతోందని, దీన్ని సరిదిద్ధకపోతే రాష్ట్రం పాతికేళ్లు వెనక్కి పోయే ప్రమాదం ఉందని ఆమె అన్నారు. తెలుగుదేశం పార్టీ అధ్యక్షుడు నారా చంద్రబాబునాయుడిపై హైకోర్టు ఆదేశాల గురించి ప్రశ్నించగా మూడు నెలల సమయం ఇచ్చినందున అంతదాకా వేచి చూడాలని ఆమె అన్నారు.

తెలంగాణపై తీసుకునే నిర్ణయం తప్పకుండా దేశవ్యాప్తంగా ప్రభావం చూపుతుందని, దేశంలో అనేక రాష్ట్రాల నుంచి డిమాండ్లు ఉన్నాయని, కాబట్టి దీనిపై సమగ్గరంగా ఓ నిర్ణయానికి రావాల్సిన అవసరం ఉందని ఆమె అన్నారు. దేశశ్రేయస్సును దృష్టిలో పెట్టుకుని ప్రధాని తెలంగాణపై ఓ నిర్ణయానికి వచ్చి ఉంటారని ఆమె అన్నారు. గులాం నబీ ఆజాద్, ప్రణబ్ ముఖర్జీ మాటలను బట్టి తెలంగాణపై త్వరలో నిర్ణయం వస్తుందని ఆశిస్తున్నామని, వారు తీసుకునే నిర్ణయానికి అందరూ కట్టుబడి ఉండాల్సిన అవసరం, బాధ్యత ఉందని ఆమె అన్నారు. జనవరి లోపు తెలంగాణపై నిర్ణయం వస్తుందని భావిస్తున్నట్లు ఆమె తెలిపారు. తెలంగాణపై నిర్ణయం అందరికీ ఆమోదయోగ్యంగా ఉండాలని ఆమె అన్నారు.

Published On November 15, 2011