కరుణానిధికి మరో షాక్, డిఎంకె రితేష్ కుమార్ అరెస్టు

By Pratap

Published: Wednesday, November 16, 2011, 10:44 [IST]

చెన్నై: ముఖ్యమంత్రి జయలలిత డిఎంకె అధినేత కరుణానిధిని దెబ్బ మీద దెబ్బ కొడుతోంది. భూకబ్జా కేసులో డిఎంకె పార్లమెంటు సభ్యులు రితేష్ కుమార్‌ను పోలీసులు బుధవారం అరెస్టు చేశారు. రామనాథపురం నియోజకవర్గం నుంచి రితేష్ కుమార్ లోకసభకు ఎన్నికయ్యారు. కాంచీపురం జిల్లా పప్పనగుడి గ్రామానికి చెందిన సామికన్ను ఇచ్చిన ఫిర్యాదు మేరకు పోలీసులు ఆయనను అరెస్టు చేశారు. నకిలీ పత్రాలు సృష్టించి రితేష్ కుమార్ తనకు చెందిన 1.47 ఎకరాల భూమిని లాక్కున్నారని సామికన్ను ఆరోపించారు.

రితేష్ కుమార్ తొలిసారి పార్లమెంటుకు ఎన్నికయ్యారు. రామనాథపురంలో ఆయన బలమైన నాయకుడిగా ఎదిగారు. జయలలిత అధికారంలోకి వచ్చిన తర్వాత భూకబ్జాలపై ప్రభుత్వం ప్రధానంగా దృష్టి సారించింది. పలువురు డిఎంకె నాయకులు భూకబ్జా కేసుల్లో అరెస్టయ్యారు. వారిలో శాసనసభ్యులు, మాజీ మంత్రులు కూడా ఉన్నారు. రాజకీయ కక్షతోనే అరెస్టులకు ప్రభుత్వం పాల్పడుతోందని డిఎంకె విమర్శిస్తోంది.

Published On November 16, 2011