రామోజీ రావు పిటిషన్‌పై హైకోర్టు విచారణ ప్రారంభం

By Pratap

Published: Monday, December 5, 2011, 16:29 [IST]

హైదరాబాద్: తెలుగుదేశం పార్టీ అధ్యక్షుడు నారా చంద్రబాబు నాయుడు ఆస్తుల కేసులో ఈనాడు అధిపతి రామోజీ రావు వేసిన వెకేట్ పిటిషన్‌పై సోమవారం హైకోర్టులో విచారణ ప్రారంభమైంది. తమ వాదన వినకుండా తమపై ప్రాథమిక విచారణకు ఆదేశించడాన్ని వ్యతిరేకిస్తూ రామోజీ రావు హైకోర్టులో వెకేట్ పిటిషన్ దాఖలు చేశారు. హైకోర్టులో వెకేట్ పిటిషన్ దాఖలు చేసుకోవచ్చునని ఇంతకు ముందు చంద్రబాబు ఆస్తుల కేసులో సుప్రీంకోర్టు సూచించింది. ఈ మేరకు రామోజీ రావు వెకేట్ పిటిషన్ దాఖలు చేశారు. తనపై విచారణకు జారీ చేసిన ఆదేశాలను ఉపసంహరించుకోవాలని కోరుతూ ఆయన పిటిషన్ దాఖలు చేశారు.

ప్రస్తుతం తాము ప్రాథమిక విచారణకు మాత్రమే ఆదేశించామని, ఆరోపణలు ఎదుర్కున్నవారిపై వారి విచారణకు గతంలో ఆదేశించిన సందర్భాలు ఉన్నాయని, అదే రీతిలో ఇప్పుడు ఆదేశాలు ఇచ్చామని హైకోర్టు బెంచ్ తెలిపింది. ప్రాథమిక విచారణలో తేలిన అంశాలను బట్టి నోటీసులు జారీ చేసి మీ వాదన కూడా వింటామని కోర్టు తెలిపింది. వైయస్సార్ కాంగ్రెసు పార్టీ శాసనసభ్యురాలు వైయస్ విజయమ్మ వేసిన పిటిషన్‌పై హైకోర్టు చంద్రబాబుతో సహా 13 మందిపై విచారణ జరపాలని సిబిఐని, ఎన్‌ఫోర్స్‌మెంట్ డైరెక్టరేట్, డిజిపి, హోంశాఖ కార్యదర్శులను ఆదేశించిన విషయం తెలిసిందే.

రామోజీ రావు వెకేట్ పిటిషన్‌పై హైకోర్టు విచారణను ఎల్లుండికి వాయిదా వేసింది. తమ వాదనలు వినకుండా ప్రాథమిక విచారణకు ఆదేశించడం సరి కాదని రామోజీ రావు తరఫు న్యాయవాది అన్నారు. తమకు తమ వాదనలు వినిుపించే అవకాశం ఇవ్వాలని ఆయన కోరారు. ప్రాథమిక విచారణ పూర్తయిన తర్వాత నోటీసులు ఇవ్వవచ్చు కదా అని న్యాయమూర్తి అడిగారు. ప్రతివాదులను నిందితులుగా పేర్కోనడం లేదని ఆయన చెప్పారు. ఇప్పటికే ఆదేశాలు ఇచ్చినందున ప్రాథమిక విచారణను కొనసాగనివ్వాలని వైయస్ విజయమ్మ తరఫు న్యాయవాది కోరారు. విచారణకు ఎటువంటి ఆటంకం కలిగించవద్దని కోరారు.

Published On December 5, 2011