118 ఏళ్ల నాటి సరిహద్దు గోడలు బద్దలు.. ఇకపై నో పాస్పోర్ట్, నో వీసా!
ఒక వైపు సంపదతో తులతూగే బ్రిటన్ ఆధీనంలోని చిన్న భూభాగం.. మరోవైపు ఉపాధి కోసం అలమటించే స్పెయిన్ సరిహద్దు జనాలు. ఈ ఇద్దరి మధ్య శతాబ్దానికి పైగా సాగిన కష్టాలకు, కిలోమీటర్ల కొద్దీ క్యూ లైన్లకు తెరపడనుంది. ఎన్నో చారిత్రక యుద్ధాలకు, దశాబ్దాల దిగ్బంధనాలకు సాక్ష్యంగా నిలిచిన 'జిబ్రాల్టర్' సరిహద్దులు ఎట్టకేలకు తెరుచుకోనున్నాయి. జూలై 15 బుధవారం నుంచి ఇరు ప్రాంతాల మధ్య అంతర్జాతీయ చెక్పోస్టుల ఆంక్షలను పూర్తిగా ఎత్తివేస్తున్నారు. బ్రిటన్, యూరోపియన్ యూనియన్ (ఈయూ) మధ్య కుదిరిన కీలక ఒప్పందంతో ఈ చారిత్రాత్మక మార్పు చోటుచేసుకోబోతోంది.
దాదాపు 40 వేల జనాభా ఉన్న జిబ్రాల్టర్, ప్రపంచంలోనే అత్యధిక తలసరి ఆదాయం కలిగిన సంపన్న ప్రాంతాల్లో ఒకటి. కానీ, దానికి ఆనుకుని ఉన్న స్పెయిన్ సరిహద్దు పట్టణాల్లో నిరుద్యోగం, పేదరికం ఎక్కువ. దీనివల్ల నిత్యం 15 వేల మందికి పైగా స్పెయిన్ కార్మికులు, ఉద్యోగులు ఉపాధి కోసం జిబ్రాల్టర్కు రాకపోకలు సాగిస్తుంటారు. కేవలం సైకిల్పై వెళ్లేంత చిన్న దూరమే అయినా.. మధ్యలో అంతర్జాతీయ సరిహద్దు ఉండటంతో ప్రతిరోజూ ఉదయం, సాయంత్రం ఇమ్మిగ్రేషన్ తనిఖీల కోసం గంటల తరబడి వేచి చూడాల్సి వచ్చేది. ఈ వీసా, పాస్పోర్ట్ నిబంధనలు స్థానికులకు నిత్యం నరకాన్ని చూపించేవి.
బ్రెగ్జిట్ తెచ్చిన సరికొత్త మలుపు
బ్రిటన్ దేశం యూరోపియన్ యూనియన్ నుంచి బయటకు వచ్చిన తర్వాత (బ్రెగ్జిట్), భౌగోళికంగా స్పెయిన్తో సరిహద్దు పంచుకుంటున్న జిబ్రాల్టర్ భవిష్యత్తు పెద్ద ప్రశ్నార్థకంగా మారింది. అయితే, సుదీర్ఘ చర్చల అనంతరం ఇరు పక్షాలు ఒక సయోధ్యకు వచ్చాయి. కొత్త నిబంధనల ప్రకారం.. సరిహద్దు గోడలను తొలగించి, ప్రజల స్వేచ్ఛా రవాణాకు పచ్చజెండా ఊపారు.
ఇకపై ఆంక్షల్లేని ప్రయాణం
తాజా నిర్ణయంతో స్పెయిన్ నుంచి జిబ్రాల్టర్ వెళ్లే కార్మికులకు చెక్పోస్టుల తిప్పలు తప్పనున్నాయి. అలాగే యూరోపియన్ యూనియన్ పరిధిలోని పౌరులు కూడా ఎలాంటి ప్రత్యేక అనుమతులు లేకుండా నేరుగా స్పెయిన్ మార్గం గుండా జిబ్రాల్టర్ పర్యాటక ప్రాంతాలను సందర్శించవచ్చు. వ్యాపార, పర్యాటక రంగాలకు ఈ నిర్ణయం భారీ బూస్ట్ను ఇస్తుందని నిపుణులు భావిస్తున్నారు. భౌగోళిక రేఖలు వేరైనా, ప్రజల బంధాలను వేరు చేయలేమని ఈ సరిహద్దుల తొలగింపు మరోసారి నిరూపించింది.
Click it and Unblock the Notifications
Sign in with Google