ఫిబ్రవరిలో కేంద్ర మంత్రివర్గంలోకి చిరంజీవి?

న్యూఢిల్లీ: కావూరి సాంబశివ రావు వంటి పార్లమెంటు సభ్యులు వ్యతిరేకించినా చిరంజీవికి కేంద్ర మంత్రివర్గంలో చోటు కల్పించాలని కాంగ్రెసు అధిష్టానం ఆలోచిస్తున్నట్లు సమాచారం. ఫిబ్రవరిలో ఆయనను కేంద్ర మంత్రి వర్గంలోకి తీసుకోవాలని నిర్ణయం జరిగిపోయినట్లు ఎఐసిసి వర్గాలు చెబుతున్నాయి. ఏప్రిల్‌లో ఆయనను రాజ్యసభకు ఎంపిక చేయనున్నట్లు తెలుస్తోంది. మంత్రి పదవి చేపట్టిన తర్వాత ఆరు నెలలోగా లోకసభకు గానీ రాజ్యసభకు గానీ ఎన్నిక కావాల్సి ఉంటుంది. దీంతో ఫిబ్రవరిలో చిరంజీవికి మంత్రి పదవి ఇచ్చి, ఏప్రిల్‌లో రాజ్యసభకు ఎంపిక చేయాలని అధిష్టానం ఆలోచనగా చెబుతున్నారు.

ప్రజారాజ్యం పార్టీని కాంగ్రెసులో విలీనం చేసి, రాష్ట్ర ప్రభుత్వాన్ని కాపాడిన చిరంజీవికి సముచిత స్థానం కల్పించే విషయంపై చాలా కాలంగా చర్చ జరుగుతూనే ఉంది. ఎప్పటికప్పుడు ఆయనకు తగిన స్థానం కల్పించే విషయంలో జాప్యం జరుగుతూనే ఉన్నది. ఈ స్థితిలోనే చిరంజీవి అలకబూనినట్లు చెబుతున్నారు. ఆయన వర్గం శానససభ్యులు కూడా తీవ్ర అసంతృప్తితో ఉన్నట్లు బయటపడింది. ఈ నేపథ్యంలో ఒకటి, రెండు నెలల్లో చిరంజీవికి, ఆయన వర్గానికి తగిన స్థానాలు కల్పించే విషయంపై చర్యలు తీసుకుంటున్నట్లు తెలుస్తోంది.

English summary

Chiranjeevi may be inducted into Union cabinet in February and in April he will be elected to Rajyasabha.