చస్తుంటే అవినీతి పోరాటమా?: జెపికి తెలంగాణ సెగ

By Srinivas

Published: Friday, December 16, 2011, 17:49 [IST]

ఖమ్మం: లోక్‌సత్తా అధ్యక్షుడు, కూకట్ పల్లి శాసనసభ్యుడు జయప్రకాశ్ నారాయణకు శుక్రవారం ఖమ్మం జిల్లాలో తెలంగాణ సెగ తగిలింది. అవినీతి వ్యతిరేక పోరాట సదస్సులో పాల్గొనేందుకు జెపి ఖమ్మం పట్టణంలోని పెవిలియన్ గ్రౌండ్‌కు వచ్చారు. విషయం తెలుసుకున్న పలువురు తెలంగాణవాదులు అక్కడకు వచ్చి తెలంగాణకు వ్యతిరేకంగా వ్యవహరిస్తున్న జెపి ఇక్కడ నుండి వెళ్లి పోవాలని డిమాండ్ చేశారు. వేదిక పైకి వెళుతున్న ఆయనను అడ్డుకునే ప్రయత్నాలు చేశారు. తెలంగాణ కోసం విద్యార్థులు ప్రాణత్యాగం చేసుకుంటుంటే అవినీతిపై పోరాటమంటూ తెలంగాణలో పర్యటించడమేమిటని ప్రశ్నించారు. వెంటనే అప్రమత్తమైన పోలీసులు ఆందోళనకారులను అదుపులోకి తీసుకున్నారు.

అనంతరం జెపి వేదిక పైకి ఎక్కి తన ప్రసంగాన్ని కొనసాగించారు. ఈ సందర్భంగా ఆయన మాట్లాడుతూ రాజకీయాల్లోకి కొత్తతరం వస్తేనే మార్పులు వస్తాయని అన్నారు. నిరుపేద విద్యార్థులకు వెయిటేజీ ఇవ్వడం ద్వారా పేదరికాన్ని నిర్మూలించవచ్చునని ఆయన అన్నారు. యువత ఓటు హక్కును వృథా చేయవద్దన్నారు.

Published On December 16, 2011