బొత్స కూతురుకు ప్రత్యేక పరీక్ష, సోదరికోసం శైలజానాథ్?

హైదరాబాద్: విశాఖ ఆంధ్ర మెడికల్ కళాశాలలో ఫైనలియర్ చదువుతున్న ప్రదేశ్ కాంగ్రెసు కమిటీ అధ్యక్షుడు బొత్స సత్యనారాయణ కుమార్తె బొత్స అనూష ఒక్కరే ప్రత్యేకంగా రెండు రోజులుగా ఎస్పీఎం లెక్చర్ హాలులో ఎంబిబిఎస్ ఇంటర్నల్ అసెస్మెంట్ పరీక్ష రాస్తున్నారని సాక్షి పత్రిక రాసింది. అనూషతో ప్రత్యేకంగా పరీక్ష రాయిస్తున్న విషయం తెలిసుకున్న విద్యార్థులు ఆగ్రహం చెంది బుధవారం మధ్యాహ్నం మీడియా ప్రతినిధులకు తెలిపారని, వారు వచ్చి ఆరా తీయగా ఎస్పీఎం హాలులో ఇంటర్నల్ పరీక్ష జరుగుతున్న విషయాన్ని అక్కడే ఉన్న ఏఎంసి ఉద్యోగిని ధృవీకరించారని అయితే వారు ఎస్పీఎం హాలుకు వారు చేరుకునేసరికి తాళాలు వేసి ఉందని తెలిపింది. అసలు అనూష ఏఎంసిలో ప్రత్యేక జీవో ద్వారా చేరారని పేర్కొంది.

మరోవైపు మంత్రి శైలజానాథ్ తన చెల్లెలు కోసం ప్రభుత్వ నిబంధనలు పక్కన పెట్టినట్లుగా ఈనాడు పేర్కొంది. కర్నూలు సర్వశిక్ష అభియాన్ ప్రాజెక్టు అధికారిణిగా ఆమెను నియమించేందుకు ప్రతిపాదనలు పక్కన పెట్టడం, వాటికి ప్రభుత్వం నుంచి ఆమోదం అన్నీ చకచకా జరిగిపోయాయట. హిందూపురంలో ఎస్‌డిజిఎస్ ఎయిడెడ్ డిగ్రీ కళాశాలలో జువాలజీ అధ్యాపకురాలిగా పని చేస్తున్న నీరజను, కర్నూలు పివోగా నెలన్నర క్రితం ప్రతిపాదించారు. వెంటనే ఆమోదం తెలిపిన ప్రభుత్వం త్వరలో ఉత్తర్వులు జారీ చేయడానికి కూడా సిద్ధమైందట.

English summary

PCC chief Botsa Satyanarayana daughter Anusha wrote MBBS internal assessment in special room, wrote Sakshi daily.