పటోళ్ల హత్యలో నయీం పాత్ర: ఎకె ఖాన్ అనుమానం

హైదరాబాద్: పటోళ్ల గోవర్ధన్ రెడ్డి హత్య కేసులో నయీం గ్యాంగ్ హస్తం ఉందని నగర పోలీసు కమిషనర్ ఏకె ఖాన్ శుక్రవారం అనుమానం వ్యక్తం చేశారు. వారి పాత్ర ఉన్నట్టు తేలితే వారిని కూడా నిందితులుగా చేరుస్తామన్నారు. పటోళ్ల హత్య కేసులో అరెస్టు చేసిన అనిల్, శ్రీనివాస్, ప్రశాంత్ రెడ్డి, అహ్మద్, నరేందర్ అనే ఐదుగురు నిందితులను పోలీసులు మీడియా ఎదుట ప్రవేశ పెట్టారు. ఈ సందర్భంగా నగర సిపి ఎకె ఖాన్ మాట్లాడారు. ఉప్పల్ భూ వివాదమే పటోళ్ల హత్యకు కారణమని స్పష్టం చేశారు. ఉప్పల్‌లోని పదిహేను ఎకరాల స్థలం విషయంలో చల్లా చంద్రారెడ్డి నయీం గ్యాంగ్‌ను ఆశ్రయించినట్లుగా తెలుస్తోందన్నారు. పటోళ్ల అనుచరుడు అనిల్ నయీం గ్యాంగ్‌తో కుమ్మక్కై హత్య చేయించినట్లుగా ఆయన అనుమానం వ్యక్తం చేశారు. నయీం, శేషన్న పాత్రలపై పూర్తిగా విచారణ జరిపిస్తామన్నారు. కాగా నిందితుల నుండి పోలీసులు నాలుగు కత్తులను స్వాధీనం చేసుకున్నారు.

కాగా గురువారం మహబూబ్ నగర్ జిల్లా కొత్తూరు పోలీసు స్టేషన్ పరిధిలో ఐదుగురు నిందితులు లొంగిపోయిన విషయం తెలిసిందే. పోలీసులు వారిని అప్పుడే హైదరాబాద్ తరలించారు. అంతకుముందు రోజు నిందితులు తామే పటోళ్లను హత్య చేశామని, హత్యలో నయీం గ్యాంగ్‌కు సంబంధం లేదని, తాము లొంగిపోయేందుకు సిద్ధంగా ఉన్నామని ఓ టీవి ఛానల్‌కు సిడి పంపిన విషయం తెలిసిందే. అందులో వారికి పోలీసుల నుండి ప్రాణభయం ఉన్నట్లు చెప్పారు. పోలీసులు ఎక్కడకు వచ్చి లొంగిపొమ్మంటే అక్కడకు వస్తామని చెప్పారు.