అందరివి ఒకేలా: చిన జీయర్ వ్యాఖ్యలపై కనుమూరి

By Srinivas

Published: Monday, January 16, 2012, 12:11 [IST]

గుంటూరు: ఆధ్యాత్మికవేత్త చిన జీయర్ స్వామి ఆరోపణలను సామాన్య భక్తుల ఆరోపణలను ఒకేలా తీసుకుంటామని తిరుమల తిరుపతి దేవస్థానం చైర్మన్ కనుమూరి బాపిరాజు సోమవారం గుంటూరు జిల్లాలో అన్నారు. దేవుడి ముందు అందరూ సమానులే అన్నారు. అందరి ఆరోపణలను ఒకేలా తీసుకుంటామని చెప్పారు. విఐపిల కంటే సామాన్య భక్తులకే దేవస్థానం ఎక్కువ ప్రాధాన్యత ఇస్తుందన్నారు. భక్తులకు ఎలాంటి ఇబ్బందులు రాకుండా చూసుకుంటామని చెప్పారు. రాష్ట్రంలోని పలు పురాతన ఆలయాలకు నిధులు కేటాయిస్తామని చెప్పారు. కాగా ఇటీవల చిన జీయర్ స్వామి రెండుసార్లు తిరుమల తిరుపతి దేవస్థానంపై విమర్శలు చేసిన విషయం తెలిసిందే.

తిరుమలకు వెళుతుంటే బార్‌లకు వెళ్లినట్లుగా ఉందని ఆయన మొదటిసారి విమర్శించారు. అనంతరం మూడు రోజుల క్రితం మరోసారి ప్రభుత్వం, టిటిడి తీరుపై ధ్వజమెత్తారు. విజయవాడలో జరిగిన ఓ కార్యక్రమంలో పాల్గొన్న ఆయన తిరుమలలో అన్ని ఉల్లంఘనలే జరుగుతున్నాయని, సౌకర్యాలు, భద్రత, పెద్దల పేరుతో నియమాలు ఉల్లంఘించడం న్యాయం కాదని, దేహం చాలిస్తే కొండపై ఎలాంటి సంస్కారాలు చేయవద్దని, శేషాచలవాసుడు అందుకు అంగీకరించడని, నియమాలు ఉల్లంఘించడమంటే దేవుడిని అవమానించడమేనని ఆగ్రహం వ్యక్తం చేశారు.

Published On January 16, 2012