మాజీ ఎమ్మెల్యేపై లిక్కర్ వ్యాపారుల దాడి!, కేసు బుక్

By Srinivas

Published: Monday, January 16, 2012, 15:38 [IST]

విశాఖపట్నం: తెలుగుదేశం పార్టీ నేత, పాయకరావుపేట మాజీ శాసనసభ్యులు చెంగల వెంకట రావుపై పలువురు మద్యం వ్యాపారులు సోమవారం దాడి చేసినట్లుగా తెలుస్తోంది. ఎమ్మార్పీ ధరకే మద్యం అమ్మాలని డిమాండ్ చేస్తూ చెంగల వెంకట రావు ఆధ్వర్యంలో తెలుగుదేశం పార్టీ విశాఖపట్నం జిల్లాలోని నక్కపల్లిలో ఆందోళనకు దిగారు. దీంతో పలువురు వ్యాపారులు, టిడిపి కార్యకర్తల మధ్య వాగ్వాదం చోటు చేసుకుంది. ఈ క్రమంలో కొందరు ఎమ్మెల్యేపై దాడికి యత్నించారని సమాచారం. చెంగల కారును ధ్వంసం చేశారు. మాజీ ఎమ్మెల్యేపై జరుగుతున్న దాడిని అడ్డుకునేందుకు పోయిన పలువురు టిడిపి కార్యకర్తలకు గాయాలయ్యాయి. దీంతో వారు తమపై దాడి చేసిన వారిపై చర్యలు తీసుకోవాలంటూ స్థానిక పోలీస్ స్టేషన్‌లో ఫిర్యాదు చేశారు.

మద్యాన్ని ఎమ్మార్పీ ధరకే అమ్మాలను సాక్షాత్తూ ముఖ్యమంత్రి కిరణ్ కుమార్ రెడ్డి ఆదేశాలు జారీ చేశారని, మరో మంత్రి ఎమ్మార్పీ కంటే ఎక్కువ ధరకు అమ్మితే పర్మిట్లు రద్దు చేస్తామని హెచ్చరించారని అయినప్పటికీ వ్యాపారులు ఎమ్మార్పీ కంటే ఎక్కువకు అమ్ముతున్నారని ఈ సందర్భంగా చెంగల ఆరోపించారు. ఎమ్మార్పీకే అమ్మాలంటూ శాంతియుతంగా మేం ధర్నా చేస్తుంటే మాపై దాడి చేస్తారా అని ప్రశ్నించారు. దళితుడిపై దాడి చేశారన్నారు. పాయకరావుపేటలో ఎమ్మార్పీకే అమ్ముతున్నారని నక్కపల్లిలో మాత్రం ఎక్కువ ధరకు అమ్ముతున్నారన్నారు. చెంగలపై దాడి చేయబోతుండగా తాము అడ్డుపడేందుకు వెళ్లామని, ఈ సమయంలో తనను కులం పేరుతో దూషిస్తూ దాడి చేశారని బాధిత కార్యకర్త తెలిపారు.

Published On January 16, 2012