చలికి తీవ్రతకు వణుకుతున్న రాష్ట్రం, 35 మంది మృతి

హైదరాబాద్: రాష్ట్రాన్ని చలి వణికిస్తోంది. రోజు రోజుకు పెరుగుతున్న చలికి వృద్ధులే కాదు మధ్యవయస్కులు కూడా తట్టుకోలేక పోతున్నారు. గత మూడు రోజులుగా చలి తీవ్రత పెరిగింది. కనిష్ట ఊష్ణోగ్రత పదిగా ఉంది. కోస్తా తీర ప్రాంతమైన శ్రీకాకుళం జిల్లా కళింగపట్నంలో శనివారం 9 డిగ్రీలుగా ఊష్ణోగ్రత ఉంది. గత కొన్ని దశాబ్ధాల్లో ఇంత తక్కువ నమోదైన సంఘటన లేదు. విశాఖ నగరంలో ఆదివారం 11.2 డిగ్రీల కనిష్ఠ ఊష్ణోగ్రత నమోదైంది. పాడేరులో 1 డిగ్రీ ఊష్ణోగ్రత నమోదైంది. మూడు రోజులుగా చలికి తట్టుకోలేక రాష్ట్రవ్యాప్తంగా దాదాపు ముప్పై ఐదు మంది మృతి చెందారు. గుంటూరులో ఆరుగురు, శ్రీకాకుళం, కరీంనగర్‌లో నలుగురు, నల్గొండలో ఇద్దరు చనిపోయారు. మంగళవారం విజయనగరం జిల్లాలో ఒక వృద్ధుడు, శ్రీకాకుళం జిల్లా పలాసలో ఓ మహిళ మృతి చెందారు. రానున్న రెండు రోజుల్లో చలి తీవ్రత మరింత ఎక్కువగా ఉండే అవకాశముందని వాతావరణ నిపుణులు చెబుతున్నారు.

విశాఖ ఏజెన్సీ ప్రాంతాల్లో మూడు రోజులుగా సున్నా, అంతకంటే తక్కువ డిగ్రీల ఊష్ణోగ్రతలే నమోదవుతున్నాయి. పది డిగ్రీల కంటే తక్కువ కనిష్ఠ ఊష్ణోగ్రతలుంటే ఆయా ప్రాంతాల్లో తీవ్ర చలిగాలి పరిస్థితులు ఉన్నట్లు వాతావరణ శాఖ అధికారులు ప్రకటిస్తారు. శ్రీకాకుళం, గుంటూరు, అదిలాబాద్, కరీంనగర్, నల్గొండ, మెదక్, అనంతపురం, కడప జిల్లాల్లో తీవ్రమైన చలి పరిస్థితులు కొనసాగుతున్నాయి. చలి తీవ్రతకు జనాలు బయటకు రావడం లేదు. ఉత్తరాదిన చలిగాలుల విజృంభన కొనసాగుతోంది.

English summary

Thirty five people dead with cold wave in Andhra Pradesh.