హైదరాబాద్ మూడు సాఫ్ట్‌వేర్ కంపెనీలపై సిఐడి దర్యాప్తు

By Pratap

Published: Tuesday, January 17, 2012, 10:36 [IST]

హైదరాబాద్: ఉద్యోగాలు ఎర చూపి మోసం చేసిన సాఫ్ట్‌వేర్ కంపెనీలపై ఎట్టకేలకు రాష్ట్ర ప్రభుత్వం దృష్టి సారించింది. హైదరాబాదుకు చెందిన మూడు సాఫ్ట్‌వేర్ కంపెనీలపై దర్యాప్తు చేయాలని ఆంధ్రప్రదేశ్ ప్రభుత్వం నేర పరిశోధన విభాగం (సిఐడి)ని ఆదేశించింది. సమగ్ర దర్యాప్తు జరిపి తగిన చర్యలు తీసుకోవాలని ఆదేశిస్తూ కేసులను సిఐడికి అప్పగించాలని నిర్ణయించినట్లు ఐటి కార్యదర్శి సంజయ్ జాజు చెప్పారు. హైదరాబాదులోని మూడు సాఫ్ట్‌వేర్ కంపెనీలు ఉద్యోగాలు ఇప్పిస్తామని చెప్పి కోట్లాది రూపాయలు వసూలు చేసి మోసం చేసినట్లు వార్తలు వచ్చాయి.

కొన్ని కంపెనీలు ఉద్యోగులకు వేతనాలను చెల్లించకుండా, నిబంధనలు బేఖాతరు చేస్తూు మూత పడుతున్నాయనే ఆరోపణలు కూడా వచ్చాయి. పలు ఫిర్యాదులపై దర్యాప్తును ప్రారంభించడానికి ఇన్‌ఫర్మేషన్ టెక్నాలజీ, కమ్యూనికేషన్స్ శాఖ ముఖ్యమంత్రి ఆమోదాన్ని కోరింది. ఉద్యోగాలు ఇప్పిస్తామని నిరుద్యోగులను మోసం చేసిన కంపెనీల ఉదంతాలు, ఉద్యోగులకు జీతాలు చెల్లించకుండా సంస్థలను మూసేస్తున్న సంఘటనలు హైదరాబాదులో జరుగుతున్న నేపథ్యంలో ఐటి శాఖ చర్యలకు దిగుతోంది.

Published On January 17, 2012