ఆస్తి కోసం చిన్నారులను చంపిన మేనమామ, అరెస్టు

By Srinivas

Published: Tuesday, January 17, 2012, 12:31 [IST]

చిత్తూరు: జిల్లాలోని వెదురుకుప్పంలో ఘోరం జరిగింది. ఆస్తి కోసం మేనమామ అల్లుళ్లను చంపేశాడు. చిత్తూరు జిల్లాలోని వెదురుకుప్పం మండలం రెంటలచేనులో సోమవారం రాత్రి సూర్య, దివాకర్ ఇనే ఇద్దరు చిన్నారులు కిడ్నాప్‌కు గురయ్యారు. వారిని మేనమాన నాగరాజు రాత్రి కిడ్నాప్ చేసి హత్య చేసి బావిలో పడేశాడు. చిన్నారుల తల్లిదండ్రులు మీనా, వాసులు పోలీసులను ఆశ్రయించడంతో మేనమామే హత్య చేసినట్లుగా వెలుగు వచ్చింది. ఆస్తి తగాదాల కారణంగానే తాను హత్య చేసినట్లు నిందితుడు ఒప్పుకున్నట్లుగా సమాచారం. నాగరాజుతో పాటు హత్యలో అతనికి సహకరించిన మరో ఇద్దరిని అలిపిరి పోలీసులు అదుపులోకి తీసుకొని విచారిస్తున్నారు.

సంక్రాంతి పండుగ కావడంతో మీనా తన ఇద్దరి పిల్లలతో కలిసి తిరుపతిలోని నాగరాజు ఇంటికి వెళ్లింది. కొత్త బట్టలు తెస్తానని నాగరాజు పిల్లలను బయటకు తీసుకు వెళ్లాడు. తర్వాత వాళ్లు తిరిగి రాలేదు. మంగళవారం చిన్నారులు బావిలో విగతజీవులుగా కనిపించారు. కాగా నిందితులు చెప్పిన వివరాల ప్రకారం మృతదేహాల ఆచూకి కోసం గ్రామంలోని మూడు బావులలో వెతుకుతున్నారు. అక్కడకు వచ్చిన పోలీసులతో గ్రామస్తులు నిందితులను తమకు అప్పగించాలని డిమాండ్ చేస్తూ అడ్డగించారు.

Published On January 17, 2012