పటోళ్ల హత్య సూత్రధారులకు సబిత సహకారం: వింధ్యా

By Srinivas

Published: Friday, January 20, 2012, 15:53 [IST]

హైదరాబాద్: పటోళ్ల గోవర్ధన్ రెడ్డి హత్యకు అసలు సూత్రధారు ఐన చల్లా చంద్రా రెడ్డిని వెంటనే అరెస్టు చేయాలని గోవర్ధన్ రెడ్డి భార్య పటోళ్ల వింధ్యా రెడ్డి శుక్రవారం డిమాండ్ చేశారు. చల్లా చంద్రా రెడ్డికి రాష్ట్ర హోంమంత్రి సబితా ఇంద్రా రెడ్డి సహకరిస్తున్నారని ఆమె ఆరోపించారు. రెండు రోజుల్లోగా చంద్రా రెడ్డిని, ఆయన కుమారుడ్ని అరెస్టు చేయకపోతే ముఖ్యమంత్రి కిరణ్ కుమార్ రెడ్డి క్యాంపు కార్యాలయం ముందు నిరవధిక నిరాహార దీక్షకు దిగుతానని ప్రకటించారు. ఈ కేసును సిబిఐతో దర్యాఫ్తు చేయించాలని ఆమె డిమాండ్ చేశారు. పటోళ్ల గోవర్ధన్ రెడ్డి హత్య జరిగి ఇరవై రెండు రోజులు గడుస్తున్నప్పటికీ పట్టించుకోవడం లేదని ఆమె ఆవేదన వ్యక్తం చేశారు. ఇప్పటికైనా ఈ కేసులో జోక్యం చేసుకోవాలని ఆమె విజ్ఞప్తి చేశారు.

కాగా ఇటీవల పటోళ్ల గోవర్ధన్ రెడ్డి హైదరాబాదులో హత్యకు గురైన విషయం తెలిసిందే. పటోళ్లను తామే చంపామంటూ పక్షం రోజుల క్రితం ఐదుగురు మహబూబ్ నగర్ జిల్లాలో లొంగిపోయారు. ఈ కేసులో వారి ఐదుగురితో పాటు ఇంకా పలువురి పాత్ర ఉండవచ్చునని పూర్తిగా దర్యాఫ్తు చేస్తున్నామని నగర పోలీసు కమిషనర్ నిందితులు లొంగిపోయిన సందర్భంలో చెప్పారు.

Published On January 20, 2012