మాజీమంత్రి రాజలింగం కన్నుమూత, సిఎం సంతాపం

By Srinivas

Published: Monday, January 23, 2012, 11:22 [IST]

హైదరాబాద్: ప్రముఖ స్వతంత్ర్య సమరయోధుడు, మాజీ మంత్రి ఎంఎస్ రాజలింగం సోమవారం తెల్లవారుజామున హైదరాబాద్‌లో గుండెపోటుతో మృతి చెందారు. రాజలింగం కొంతకాలంగా అనారోగ్యంతో బాధపడుతున్నారు. నాలుగు రోజుల క్రితం ఆయనకు గుండెనొప్పి రావడంతో ఆయనను సోమాజీగూడ యశోద హాస్పిటల్‌లో చేర్పించారు. చికిత్స పొందుతూ ఆయన తెల్లవారుజామున మృతి చెందారు. ఆయన వయస్సు తొంబై మూడేళ్లు. స్వతంత్ర్య సమరయోధుడు ఐన రాజలింగం మంత్రిగా పని చేశారు. ఈయన గాంధీ భవనం ట్రస్ట్ బోర్డ్ చైర్మన్‌.

ఇటీవల డిసెంబర్ 28న కాంగ్రెసు ఆవిర్భావ వేడుకల సందర్భంగా గాంధీభవన్‌లో జరిగిన ఓ కార్యక్రమంలో ముఖ్యమంత్రి కిరణ్ కుమార్ రెడ్డి, ప్రదేశ్ కాంగ్రెసు కమిటీ అధ్యక్షుడు బొత్స సత్యనారాయణ ఆయనను ఘనంగా సత్కరించారు. రాజలింగం మృతికి సిఎం, పిసిసి చీఫ్ తదితరులు సంతాపం వ్యక్తం చేశారు. రాజలింగం 1919లో వరంగల్ జిల్లాలో జన్మించారు. స్వాతంత్ర్యం వచ్చాక ఎమ్మెల్యేగా, మంత్రిగా పని చేశారు. హైదరాబాద్ రాష్ట్రంలో నాటి ముఖ్యమంత్రి బూర్గుల రామకృష్ణా రావు మంత్రివర్గంలో పని చేశారు. 1964లో న్యాయవాద వృత్తి స్వీకరించారు.

Published On January 23, 2012