బాలయ్యపై కాపునాడు ఫైర్, క్షమాపణకు డిమాండ్

విజయవాడ: కాంగ్రెసు నాయకుడు, శాసనసభ్యుడు చిరంజీవిపై తెలుగుదేశం నాయకుడు, సినీ హీరో బాలకృష్ణ చేసిన వ్యాఖ్యలపై రాష్ట్ర కాపునాడు నాయకులు తీవ్రంగా మండిపడ్డారు. విజయవాడలో బుధవారం జరిగిన కాపునాడు కార్యవర్గ సమావేశానంతరం వారు మీడియా ప్రతినిధులతో మాట్లాడారు. బాలకృష్ణ తన వ్యాఖ్యలను ఉపసంహరించుకుని, బహిరంగ క్షమాపణ చెప్పాలని, లేదంటే తెలుగుదేశం పార్టీకి కాపులు దూరమవుతారని వారు హెచ్చరించారు. బాలకృష్ణ చేసిన వ్యాఖ్యలు ఒక్క చిరంజీవిని ఉద్దేశించి మాత్రమే అన్నట్లుగా తాము భావించడం లేదని, తమ కాపుజాతి మొత్తాన్ని అన్నట్లుగా పరిగణిస్తున్నామని ఆయన అన్నారు.

ఉభయ గోదావరి జిల్లాల్లో కాపులు చాలా మంది తెలుగుదేశం పార్టీలో ఉన్నారని, బాలకృష్ణ తన వ్యాఖ్యలను వెనక్కి తీసుకుని క్షమాపణ చెప్పకపోతే వారంతా బయటకు వస్తారని ఆయన అన్నారు. కాపులను బిసిల్లో చేర్చాలని డిమాండ్ చేస్తూ ఆందోళన చేపట్టనున్నట్లు వారు తెలిపారు. ఈ నెల 27, 28,29 తేదీల్లో ధర్నాలు, రాస్తారోకోలు నిర్వహించి ముఖ్యమంత్రి కిరణ్ కుమార్ రెడ్డికి, పిసిసి అధ్యక్షుడు బొత్స సత్యనారాయణకు వినతిపత్రాలు సమర్పిస్తామని వారు చెప్పారు. కాపులను బిసీల్లో చేరుస్తామని దివంగత ముఖ్యమంత్రి వైయస్ రాజశేఖర రెడ్డి హామీ ఇచ్చారని, ఆ హామీని నిలబెట్టుకోకపోతే కాపులు కాంగ్రెసుకు దూరమవుతారని వారన్నారు.

English summary

Kapunadu has demanded Balakrishna to withdraw comments made against Chiranjeevi.