రీజెన్సీ వైస్‌చైర్మన్ మృతి హత్య కేసుగా నమోదు: డిఐజి

By Srinivas

Published: Tuesday, January 31, 2012, 10:40 [IST]

యానాం/కాకినాడ: యానాంలోని రీజెన్సీ సిరామిక్స్ కంపెనీ వైస్ చైర్మన్ చంద్రశేఖర్ మృతిని హత్య కేసుగా నమోదు చేసినట్లు పుదుచ్చేరి డిఐజి శుక్లా చెప్పారు. చంద్రశేఖర్‌ను హత్య చేసిన వారిని, పోలీసు స్టేషన్‌పై దాడి చేసిన వారిని గుర్తించినట్లు చెప్పారు. నిందితులు అరెస్టులకు తావు లేకుండా స్వచ్ఛందంగా లొంగి పోవాలని సూచించారు. యానాంలో ఇకపై ఎలాంటి అల్లర్లు చోటు చేసుకున్నా కఠిన చర్యలకు వెనుకాడబోమని హెచ్చరించారు. లూటీకి పాల్పడ్డ వారు స్వచ్ఛందంగా వస్తువులను రీజెన్సీ సంస్థకు అప్పగించాలని, లేదంటే ఇళ్లలో సోదాలు నిర్వహించి కేసులు నమోదు చేస్తామని చెప్పారు. యానాంలో ప్రస్తుతం సాధారణ పరిస్థితులు నెలకొన్నాయన్నారు. కార్మిక నేత మురళీ మోహన్ మృతి పైనా న్యాయ విచారణ జరుగుతుందని పోలీసు అధికారులు చెప్పారు.

హత్య చేసిన నిందితులను అరెస్టు చేసే సమయంలో ఎలాంటి అవాంఛనీయ సంఘటనలు జరగకుండా భారీగా బందోబస్తు ఏర్పాటు చేసినట్లు చెప్పారు. కేసు విచారణ పారదర్శకంగా జరుగుతుందని చెప్పారు. కాగా నాలుగు రోజుల క్రితం శుక్రవారం యానాంలో ఉద్రిక్త పరిస్థితులు ఏర్పడిన విషయం తెలిసిందే. కార్మికుల తొలగింపును నిరసిస్తూ రీజెన్సీ కంపెనీలో కార్మికులు నిప్పు పెట్టడం, పోలీసుల దాడి కారణంగా కార్మిక నేత మృతి, ఆ తర్వాత కార్మికుల దాడి కారణంగా వైస్ చైర్మన్ మృతి చెందిన విషయం తెలిసిందే.

Published On January 31, 2012