రోడ్డు ప్రమాదంలో విటిపిఎస్ ఏఈ దంపతుల మృతి

By Srinivas

Published: Tuesday, February 7, 2012, 10:13 [IST]

హైదరాబాద్: రాష్ట్రంలో మంగళవారం ప్రమాదాలు, దాడుల కారణంగా పలువురు మృతి చెందారు. నిజామాబాద్ జిల్లా అరసవల్లి వద్ద ఓ ఆటోను టిప్పర్ ఢీకొంది. ఈ ప్రమాదంలో ఒకే కుటుంబానికి చెందిన ఐదుగురు మృతి చెందారు. ఒకరి పరిస్థితి విషమంగా ఉంది. వారు నిజామాబాద్ జిల్లా ముజాహిద్ నగర్ వాసులుగా తెలుస్తోంది. టిప్పర్ డ్రైవర్ నిర్లక్ష్యం వల్లనే ఈ ప్రమాదం జరిగినట్లుగా తెలుస్తోంది. మెదక్ జిల్లా సదాశివపేట మండలం ఆరూర్ వద్ద ఎదురెదురుగా వస్తున్న లారీ - ఆటో ఢీకొన్న ప్రమాదంలో ముగ్గురు మృతి చెందారు. ఇది జాతీయ రహదారిపై జరిగింది. ముంబయి నుండి హైదరాబాద్ వెళ్తున్న లారీ, ఎదురుగా వస్తున్న ఆటోను ఢీకొంది. ఆటోలో ఉన్న ముగ్గురు మృతి చెందగా మరో ముగ్గురికి తీవ్ర గాయాలయ్యాయి. వారిని ఆసుపత్రికి తరలించారు. కృష్ణా జిల్లా ఇబ్రహీంపట్నంలో జరిగిన రోడ్డు ప్రమాదంలో విటిపిఎస్ ఏఈ దంపతులు మృతి చెందారు.

అదిలాబాద్ జిల్లా బాసరలో ఓ విద్యార్థి గోదావరి స్నానానికి వెళ్లి నీటి ఉధృతికి నదిలో మునిగి మృతి చెందాడు. మృతి చెందిన విద్యార్థి హైదరాబాద్‌కు చెందిన రాజేష్ అని తెలుస్తోంది. పోలీసులు మృతదేహాన్ని వెలికి తీసి కేసు దర్యాఫ్తు చేస్తున్నారు. అనంతపురం జిల్లా తాడిమర్రి మండలంలోని చిల్లావారిపల్లిలో ఓ భర్త భార్యను గొడ్డలితో నరికాడు. అనంతరం అతను కిరోసిన్ పోసుకొని ఆత్మహత్యకు పాల్పడ్డాడు. హైదరాబాదులోని సఫిల్‌గూడ రైల్వే స్టేషన్ సమీపంలో రైలు క్రింద పడి ఇద్దరు మృతి చెందారు. నిజామాబాద్ జిల్లా నందిపేట మండలం రాజుపాలెంలో సుజాత అనే వివాహిత దారుణ హత్యకు గురైంది.

Published On February 7, 2012