మిస్‌ఫైర్: బొత్సకు గురిపెడితే మోపిదేవికి తగిలింది?

హైదరాబాద్: మద్యం సిండికేట్లపై అవినీతి నిరోధక శాఖ (ఎసిబి) దాడుల వ్యవహారం మిస్ ఫైర్ అయినట్లు కనిపిస్తోంది. ఎసిబి దాడులను పిసిసి అధ్యక్షుడు బొత్స సత్యనారాయణకు గురిపెట్టాలని ముఖ్యమంత్రి కిరణ్ కుమార్ రెడ్డి భావించారని అప్పట్లో వార్తలు వచ్చాయి. తన మీద పైచేయి సాధించడానికి బొత్స సత్యనారాయణను దెబ్బ తీయడానికి ముఖ్యమంత్రి ఎసిబి దాడుల వ్యవహారాన్ని, ఎసిబి అందించిన నివేదికను అస్త్రంగా వాడాలని అనుకుంటున్నట్లు వార్తలు వచ్చాయి. అయితే, ముఖ్యమంత్రి టార్గెట్ గురి తప్పినట్లు భావిస్తున్నారు. అది కాస్తా ఆబ్కారీ శాఖ మంత్రి మోపిదేవి వెంకటరమణను తాకింది. ఎసిబి విస్తృతంగా మద్యం సిండికేట్లపై దాడులు చేస్తూ సిండికేట్ వ్యాపారులను ఆరెస్టు చేస్తోంది. ఎవరెవరికి లంచాలు అందాయనే విషయాలను కూడా సేకరించి జాబితా రూపొందించింది. మంగళవారం నున్నా వెంకటరమణ అనే సిండికేట్ వ్యాపారి అరెస్టు సంచలనం రేపింది.

ఆబ్కారీ మంత్రి మోపిదేవి వెంకటరమణకు పది లక్షల రూపాయలు లంచం ఇచ్చినట్లు ఎసిబి రిమాండ్ రిపోర్టులో పేర్కొన్నట్లు వార్తలు వచ్చాయి. దీంతో మోపిదేవి వెంకటరమణ ఆత్మరక్షణలో పడ్డారు. బొత్స సత్యనారాయణ క్షేమంగా బయటి పడి మోపిదేవి ఇరుకున్నారనే అభిప్రాయం బలపడుతోంది. తనవారికి నాలుగు మద్యం దుకాణాలున్నాయని బొత్స సత్యనారాయణ బహిరంగంగానే చెప్పారు. కాగా, విజయవాడ లిక్కర్ సిండికేట్ వ్యవహారం కూడా సంచలం సృష్టిస్తోంది. రామ్మోహన్ అనే వ్యక్తిని ఎసిబి అధికారులు అదుపులోకి తీసుకునని ప్రశ్నించారు. రామ్మోహన్ తాము ఎవరెవరికి లంచాలు ఇచ్చిందీ వివరించినట్లు చెబుతున్నారు.

English summary

It is said that CM intended to target PCC president Botsa Satyanarayana with ACB raids on liquor syndicates. But it hit to Excise minister Mopideci Venkataramana.