తెలంగాణ - టిడిపి ఫోరం ఓ డ్రామా కంపెనీ: కెటిఆర్

హైదరాబాద్: తెలుగుదేశం పార్టీ తెలంగాణ ఫోరాన్ని తెలంగాణ రాష్ట్ర సమితి (తెరాస) శానససభ్యుడు కెటి రామారావు ఓ డ్రామా కంపెనీగా అభివర్ణించారు. తెలంగాణలో జరిగే ఉప ఎన్నికలకు తెలంగాణవాదంతో సంబంధం లేదని టిడిపి తెలంగాణ నాయకులు అనడం విడ్డూరమని ఆయన శనివారం మీడియా ప్రతినిధుల సమావేశంలో అన్నారు. ప్రజల తెలంగాణ ఆకాంక్షల మేరకే శాసనసభ్యులు రాజీనామా చేసి మళ్లీ ఎన్నికలకు వస్తున్నారని ఆయన అన్నారు.

తెలంగాణవాదంపైనే ఉప ఎన్నికలు జరుగుతున్నాయని ఆయన అన్నారు. తెలంగాణ రాష్ట్ర ఏర్పాటుకు అనుకూలంగా తెలుగుదేశం పార్టీ అధ్యక్షుడు నారా చంద్రబాబు నాయుడు కేంద్ర ప్రభుత్వానికి లేఖ ఇస్తే తాము పోటీ నుంచి తప్పుకుంటామని, ఇందుకు ఈ నెల 29వ తేదీ వరకు చంద్రబాబుకు గడువు ఇస్తున్నామని ఆయన అన్నారు. ఉప ఎన్నికలకు, తెలంగాణవాదానికి సంబంధం లేదని తెలుగుదేశం తెలంగాణ నాయకులు అనడం మూర్ఖత్వమని ఆయన అన్నారు. తెలంగాణ అంశంపై తెలుగుదేశం పార్టీ కార్యాలయం ఎన్టీఆర్ ట్రస్టు భవన్‌లో తాము చర్చకు సిద్ధంగా ఉన్నట్లు ఆయన తెలిపారు.

English summary

TRS MLA KT Rama Rao termed Telangana - TDP forum as a drama company.