కెసిఆర్ పేరు చెప్పి తెలంగాణపై చంద్రబాబు దాటవేత

By Pratap

Published: Tuesday, February 21, 2012, 15:31 [IST]

హైదరాబాద్: తెలంగాణ రాష్ట్ర ఏర్పాటు శానససభలో తీర్మానం చేయాలనే తెలంగాణ రాష్ట్ర సమితి (తెరాస) చేస్తున్న డిమాండ్‌ను తెలుగుదేశం పార్టీ అధ్యక్షుడు నారా చంద్రబాబు నాయుడు తోసిపుచ్చారు. నేరుగా తోసి పుచ్చకుండా అందుకు తెరాస అధ్యక్షుడు కె. చంద్రశేఖర రావు గతంలో చేసిన ప్రకటనను ఆయన వాడుకున్నారు. తెలంగాణ ఏర్పాటుకు శాసనసభ తీర్మానం అవసరం లేదని కెసిఆర్ ఇది వరకే చెప్పారని ఆయన మంగళవారం మీడియా ప్రతినిధుల సమావేశంలో అన్నారు. తెలంగాణపై తీర్మానం చేయాలని తెరాస శానససభా సమావేశాలను అడ్డుకుంటున్న విషయం తెలిసిందే.

తమ పార్టీకి జాతీయ రాజకీయాలు కొత్త కాదని ఆయన అన్నారు. గతంలో ఇద్దరు ప్రధానులను, ఓ రాష్ట్రపతిని తాము సూచించామని ఆయన అన్నారు. తనకు రెండు సార్లు ప్రధాని అయ్యే అవకాశం వచ్చినా రాష్ట్ర ప్రయోజనాల కోసం వదులుకున్నానని ఆయన చెప్పారు. రాష్ట్రం నాయత్వ లేమితో కొట్టుమిట్టాడుతోందని, తన అనుభవం రాష్ట్ర ప్రజలకు ఉపయోగపడాలని ఆయన అన్నారు. తెలుగదేశం పార్టీ అధికారంలోకి వస్తే తానే ముఖ్యమంత్రిని అవుతానని ఆయన చెప్పారు. ప్రజా ప్రయోజనాల కోసమే తన జీవితం అంకితమని ఆయన చెప్పారు.

దేశంలో ఆంధ్రప్రదేశ్ గురించి మాట్లాడేవారే లేరని ఆయన అన్నారు. తాము బిజెపి నేతృత్వంలోని ఎన్డీయె వైపు వెళ్తున్నామనడంలో నిజం లేదని ఆయన అన్నారు. శాసనసభా సమావేశాలను నిర్వహించడం సాధ్యం కాకపోతే అధికారం నుంచి తప్పుకోవాలని ఆయను ముఖ్యమంత్రి కిరణ్ కుమార్ రెడ్డికి చురక వేశారు. కాంగ్రెసు, వైయస్సార్ కాంగ్రెసు, తెరాస అన్నీ ఒక్కటేనని ఆయన అన్నారు.

Published On February 21, 2012