జపాన్‌లో భారీ భూకంపం, సునామీ హెచ్చరిక

టోక్యో: జపాన్‌ను బుధవారం భారీ భూకంపం తాకింది. అది రెక్టర్ స్కేలుపై 6.8గా నమోదైంది. జపాన్ పసిఫిక్ తీరాన్ని చిన్నపాటి సునామీ తాకవచ్చునని హెచ్చరికలు జారీ చేశారు. హక్కోయిడో దీవిలోని మధ్య, తూర్పు పసిఫిక్ తీరంలో, ఇతర తీర ప్రాంతంలో అర మీటర మేరకు సునామీ ఎగిసిపడవచ్చునని అంచనా వేస్తున్నారు.

సునామీ హెచ్చరికలను ఎదుర్కుంటున్న ఇవాటే ప్రిఫెక్చర్ లేదా స్టేట్ నిరుటి భూకంపానికి, సునామీకి తీవ్రంగా నష్టపోయింది. అప్పటి నుంచి ఆ ప్రాంతంలో వేలసార్లు ప్రకంపనలు వచ్చాయి. భూకంప కేంద్రం జపాన్‌లోని కుషిరో దక్షిణ ప్రాంతానికి 235 కిలోమీటర్ల దూరంలో ఉంది. దాదాపు 730 కిలోమీటర్ల దూరంలో ఉన్న టోక్యోపై భూకంప ప్రభావం కనిపించలేదు.

సునామీ హెచ్చరికలపై అమెరికా అప్రమత్తమైంది. టోక్యో విమానాశ్రయంలో రాకపోకలు ఆగిపోయాయి. సునామీ తాకే అవకాశాలు ఉన్న ప్రాంతాల నుంచి ప్రజలు సురక్షిత ప్రాంతాలకు తరలిపోతున్నారు.