అధిష్టానం గ్రీన్ సిగ్నల్: చిరంజీవికి రాజ్యసభ ఖరారు

By Srinivas

Published: Friday, March 16, 2012, 14:53 [IST]

న్యూఢిల్లీ: తిరుపతి శాసనసభ్యుడు, కాంగ్రెస్ నేత చిరంజీవికి రాజ్యసభ ఖరారైందని సమాచారం. రాజ్యసభ అభ్యర్థులను ఖరారు చేసేందుకు ముఖ్యమంత్రి కిరణ్ కుమార్ రెడ్డి, ప్రదేశ్ కాంగ్రెసు కమిటీ అధ్యక్షుడు బొత్స సత్యనారాయణ ఢిల్లీ వెళ్లిన విషయం తెలిసిందే. వారు పలువురు ఢిల్లీ పెద్దలతో మాట్లాడారు. ముఖ్యమంత్రి సాయంత్రం నాలుగున్నర గంటలకు ఏఐసిసి అధ్యక్షురాలు సోనియా గాంధీతో భేటీ కానున్నారు. అయితే ఇప్పటికే చిరంజీవికి రాజ్యసభ సీటు ఖరారైందని అంటున్నారు. ఈ మేరకు అధిష్టానం నుండి చిరంజీవి వర్గాలకు గ్రీన్ సిగ్నల్ వచ్చినట్లు తెలుస్తోంది. చిరంజీవి అనుచరులు అఫిడవిట్, నామినేష్ పత్రాలను సేకరిస్తున్నారు. అధిష్టానం చిరంజీవికి ఓకె చెప్పినందు వల్లే వారు నామినేషన్ పత్రాలు సేకరిస్తున్నారని అంటున్నారు.

కాగా చిరంజీవికి రాజ్యసభ సీటుకు గ్రీన్ సిగ్నల్ వచ్చిందన్న నేపథ్యంలో గత కొంతకాలంగా ఉన్న సస్పెన్స్‌కు తెరపడినట్లే. ప్రస్తుతం పదవీ కాలం పూర్తి చేసుకున్న నలుగురికి పార్టీ అధిష్టానం ఉద్వాసన పలికే అవకాశాలు కనిపిస్తున్నాయి. నలుగురిని కొత్త వారికి అవకాశం ఇవ్వనుంది. అందులో చిరంజీవికి ఇప్పటికే ఖరారైనందున, మిగిలిన మూడు స్థానాల కోసం ఆశావాహులు పెద్దల చుట్టూ తిరుగుతున్నారు. ఆశావాహుల్లో వైయస్ వివేకానంద రెడ్డి, శారద తదితరులు ఉన్న విషయం తెలిసిందే.

Published On March 16, 2012