బాలయ్యతో తొలిసారి, అటెండెన్స్ కోసమే..: జయసుధ

హైదరాబాద్: నందమూరి హీరో బాలకృష్ణతో తాను తొలిసారి నటిస్తున్నానని సికింద్రాబాద్ శాసనసభ్యురాలు, సహజ నటి జయసుధ గురువారం అన్నారు. ఆమె అసెంబ్లీకి ఆలస్యంగా హాజరయ్యారు. లాబీల్లో నుంచి సభలోకి వెళ్లే సమయంలో అక్కడ ఉన్న విలేకరులతో సభ వాయిదా పడినట్లుందని ఆమె అన్నారు. దానికి విలేకరులు అవునని చెప్పారు. దానికి ఆమె నేను కేవలం అటెండెన్స్ కోసమే వస్తున్నట్లుగా ఉందని అన్నారు. ఆ తర్వాత ఆమె సభకు తప్పని సరిగా ప్రతిరోజు హాజరు కావాలా అని మళ్లీ విలేకరులను ప్రశ్నించారు. అందుకు వారు అదేం లేదని చెప్పారు.

ఈ సందర్భంగా ఆమె వారితో పిచ్చాపాటిగా మాట్లాడారు. మూడు రోజులుగా తాను సభకు రాలేదన్నారు. షూటింగ్ ఉంటే వెళ్లానని చెప్పారు. హీరో నందమూరి బాలకృష్ణ కథానాయకుడిగా వస్తున్న అధినాయకుడు చిత్రంలో నటిస్తున్నానని చెప్పారు. ఇందులో బాలకృష్ణ కొడుకు, తండ్రి, తాత పాత్రల్లో నటిస్తున్నారని చెప్పారు. తండ్రి పాత్రకు భార్యగా చేస్తున్నానన్నారు. బాలయ్య సరసన తొలిసారిగా నటిస్తున్నానని, ఎలా ఉంటుందో చూడాలని అన్నారు.

English summary

MLA Jayasudha said that she is acting first time with hero Balakrishna.