మంత్రులకు సుప్రీం నోటీసులకు కారణం మేమే: బొత్స

By Srinivas

Published: Friday, March 16, 2012, 9:21 [IST]

రాజమండ్రి: కిరణ్ కుమార్ రెడ్డి మంత్రివర్గంలో ఆరుగురు మంత్రులకు సుప్రీం కోర్టు నోటీసులు జారీ చేయడానికి కారణం ప్రభుత్వం తరఫు నుంచి సకాలంలో కౌంటర్ దాఖలు చేయకపోవడమేనని ప్రదేశ్ కాంగ్రెసు కమిటీ అధ్యక్షుడు బొత్స సత్యనారాయణ గురువారం అన్నారు. రత్నగిరిపై స్వామివారిని సతీసమేతంగా దర్శించుకున్న అనంతరం గురువారం విలేఖరులతో మాట్లాడారు. మంత్రులందరూ నిబంధనల మేరకే పనిచేశారని భయపడాల్సిన పనిలేదన్నారు. ప్రభుత్వం పేరుతో నిధులు దిగమింగిన వారే భయపడాలన్నారు. ఉప ఎన్నికల్లో అన్ని స్థానాల్లోను కాంగ్రెస్ విజయం సాధిస్తుందని చెప్పారు. ఎగ్జిట్‌పోల్స్ కాంగ్రెస్‌కు వ్యతిరేకంగా వచ్చాయని గుర్తు చేయగా వాటిని ఎన్నికల సంఘం నిషేధించిందని గుర్తు చేశారు.

కాగా అనంతరం బొత్స న్యూఢిల్లీ బయలు దేరి వెళ్లారు. రాజ్యసభకు రాష్ట్రం నుంచి కాంగ్రెస్ అభ్యర్థుల ఎంపిక విషయమై చర్చించేందుకు ఆయన వెళ్లారు. ముఖ్యమంత్రి కిరణ్ కుమార్ రెడ్డి కూడా శుక్రవారం వెళుతున్నారు. ఢిల్లీలో ముందుగా ఆజాద్‌తో సిఎం, బొత్స భేటీ అవుతారు. అనంతరం ఏఐసిసి అధ్యక్షురాలు సోనియా గాంధీతోనూ వీరు సమావేశం కానున్నారు. అయితే వీరు అధిష్టానం పెద్ధలతో విడివిడిగా భేటీ అవుతారా లేక ఒకేసారి భేటీ అవుతారా తెలియరాలేదు. కాగా ఉప ముఖ్యమంత్రి సి.దామోదర రాజనరసింహ కూడా శుక్రవారం ఢిల్లీ వెళ్లనున్నారు. అధిష్ఠానం పిలుపు మేరకు మంత్రి సి.రామచంద్రయ్య కూడా ఢిల్లీ వెళ్లారు. మొత్తానికి రాజ్యసభ ఎన్నికల నేపథ్యంలో రాష్ట్ర కాంగ్రెస్ ముఖ్యనేతలందరూ హస్తిన బాట పట్టడం రాజకీయంగా చర్చనీయాంశంగా మారింది.

Published On March 16, 2012