జీవితమంతా నోట్లు, వెన్నుపోట్లే: బాబుపై కెటిఆర్ ఫైర్

By Srinivas

Published: Monday, March 19, 2012, 13:36 [IST]

హైదరాబాద్: తెలుగుదేశం పార్టీ అధినేత నారా చంద్రబాబు నాయుడుపై తెలంగాణ రాష్ట్ర సమితి సిరిసిల్ల శాసనసభ్యుడు కల్వకుంట్ల తారక రామారావు సోమవారం తీవ్రస్థాయిలో మండిపడ్డారు. శాసనసభ మంగళవారానికి వాయిదా పడిన అనంతరం ఆయన మీడియా పాయింట్ వద్ద మాట్లాడారు. రాజ్యసభ ఎంపికలో చంద్రబాబుకు ఆర్థిక కోణం తప్ప కార్యకర్తల శ్రమ పట్టదని విమర్శించారు. చంద్రబాబు జీవితమంతా నోట్లు, వెన్నుపోట్లేనని ధ్వజమెత్తారు. ఆయన ఆర్థికవాదిగా, అరాచకవాదిగా మారారన్నారు. ఆదివారం జరిగిన ఉప ఎన్నికల్లో తమ పార్టీ అభ్యర్థులు ఐదు స్థానాల్లో గెలుస్తారని, నాగర్ కర్నూలులోని తాము మద్దతిచ్చిన నాగం జనార్ధన్ రెడ్డి ఘన విజయం సాధిస్తారని చెప్పారు. ఇప్పటికే మీడియా తమ గెలుపుపై చెబుతోందన్నారు. ఫలితాలు చూసైనా కాంగ్రెసు, టిడిపిలు తెలంగాణ విషయంలో బుద్ది తెచ్చుకోవాలన్నారు. తెలంగాణ విషయంలో ఆ పార్టీలు చెప్పే మాటలు ప్రజలు విశ్వసించడం లేదని ఉప ఎన్నికల ఫలితాలను బట్టి స్పష్టమవుతోందన్నారు.

తెలంగాణపై వారు ఇప్పటికైనా మనసు మార్చుకోవాలన్నారు. తాము ఉప ఎన్నికల కోసమే సభకు రావడం లేదని చెప్పి మరీ వెళ్లామని, కానీ కాంగ్రెసు, టిడిపిలు మాత్రం అలా చెప్పే ధైర్యం చేయలేక పోయాయన్నారు. వారు మ్యాచ్ ఫిక్సింగ్ చేసుకొని సభా సమయం వృథా చేశారన్నారు. సభను ప్రచారం కోసం వంతుల వారిగా వాయిదా వేశారని ఆరోపించారు. ఈ నెల 21న ఫలితాలు వస్తాయని అప్పుడు మరింత మాట్లాడతామని చెప్పారు. అవినీతికి పాల్పడుతున్న ఆ రెండు పార్టీలకు దానిపై మాట్లాడే హక్కు లేదన్నారు. 2009 సాధారణ ఎన్నికలలో కాంగ్రెసు పార్టీ అధికారంలోకి రావడానికి కారణం వైయస్ అవినీతేనని ఆరోపించారు. చంద్రబాబు అన్నా హజారేకు బంధువులా మాట్లాడుతున్నారని ఎద్దేవా చేశారు. బాబుకు నిజాయితీ, చిత్తశుద్ధి లేదన్నారు.

Published On March 19, 2012