ఎర్రబెల్లి సోదరుడిపై తెలంగాణవాదుల దాడి, ఉద్రిక్తం

By Srinivas

Published: Sunday, March 25, 2012, 11:24 [IST]

వరంగల్: తెలుగుదేశం పార్టీ సీనియర్ నేత ఎర్రబెల్లి దయాకర రావు సోదరుడు ప్రదీప్ రావుపై తెలంగాణవాదులు ఆదివారం దాడి చేశారు. తెలంగాణ కోసం శనివారం ఆత్మహత్య చేసుకున్న బోజ్యా నాయక్ మృతదేహాన్ని సందర్శించేందుకు ప్రదీప్ రావు మహాత్మా గాంధీ మెమోరియల్ హాస్పిటల్(ఎంజిఎం)కు వెళ్లారు. అయితే అక్కడ ఉన్న తెలంగాణవాదులు, విద్యార్థులు ప్రదీప్ రావుపై దాడి చేశారు. వారి దాడిని పోలీసులు, పలువురు ఇతరులు అడ్డుకున్నారు. దీంతో తెలంగాణ రాష్ట్ర సమితి కార్యకర్తలు, తెలుగుదేశం పార్టీ కార్యకర్తల మధ్య తోపులాట జరిగింది. పోలీసులు కల్పించుకొని ఇరువర్గాలను సముదాయించారు. దీంతో అక్కడి పరిస్థితి సద్దుమణిగింది.

కాగా బోజ్యానాయక్ మృతదేహాన్ని రఘునాథపల్లి మండలంలోని ఆయన గ్రామానికి తరలిస్తున్నారు. భారతీయ జనతా పార్టీ రాష్ట్ర అధ్యక్షుడు కిషన్ రెడ్డి, తెలంగాణ ఐక్య కార్యాచరణ సమితి చైర్మన్ కోదండరామ్, శాసనమండలి సభ్యుడు చుక్కా రామయ్య, తెరాస నేత వినోద్ కుమార్, హరీష్ రావు బోజ్యా నాయకు కుటుంబ సభ్యులను పరామర్శించారు. కాగా జెఏసి వరంగల్ జిల్లాలోని పలు డిపోల వద్ద ఆందోళన చేస్తోంది. వరంగల్ బంద్ నిర్వహిస్తున్నారు.

Published On March 25, 2012