విమర్శలను ఎదుర్కుంటా, వెనక్కి తగ్గను: కిరణ్ రెడ్డి

హైదరాబాద్: తమపై ఎన్ని విమర్శలు వచ్చినా, వాటిని సమర్థవంతంగా ఎదుర్కొంటామని, యువతకు ఉపాధి కల్పించడంలో వెనక్కి తగ్గేది లేదని ముఖ్యమంత్రి కిరణ్ కుమార్ రెడ్డి అన్నారు. రాజీవ్ యువకిరణాల పథకంపై ముఖ్యమంత్రి కిరణ్‌కుమార్‌రెడ్డి శుక్రవారం సమీక్ష సమావేశం నిర్వహించారు. ఈ ఏడాది మూడు లక్షల మంది యువతకు శిక్షణ ఇచ్చి, ఉద్యోగ అవకాశాలు కల్పిస్తామని సీఎం తెలిపారు. ఇచ్చిన మాట ప్రకారం 2014 నాటికి తాము చెప్పినట్లుగా 15 లక్షల మంది యువతకు ఉద్యోగ అవకాశాలు కల్పిస్తామని కిరణ్‌కుమార్ రెడ్డి మరో మారు స్పష్టం చేశారు.

హైదరాబాదులోని జూబ్లీహాల్‌లో యువ కిరణాలు, ఎంప్లాయిస్ మిషన్ ఆధ్వర్యంలో నిర్వహించిన నేషనల్ వర్క్ షాప్ కార్యక్రమంలో కిరణ్‌కుమార్ రెడ్డి పాల్గొన్నారు. పోస్టు గ్రాడ్యుయేషన్‌తో పాటు ఉన్నత విద్య అభ్యసించిన వారు చిన్న ప్రభుత్వ ఉద్యోగాలపై దృష్టి పెట్టారని చెప్పారు. యువత ప్రయివేటు రంగంలో ఉద్యోగావకాశాలపై దృష్టి పెట్టాలని ఆయన చెప్పారు. గ్రామాల్లో ఉద్యానవనం, డెయిరీఫాం వంటి ఉపాధి మార్గాలను మెరుగు పరచుకోవాలని ఆయన యువతకు పిలుపునిచ్చారు. విద్యారంగంలో చాలా లోపాలు ఉన్నాయని, విద్యా సంస్థలు కూడా తమ స్వలాభాల కోసం కాకుండా పారిశ్రామిక అవసరాల కనుగుణంగా విద్యా ప్రమాణాలను తీర్చి దిద్దాలని కోరారు.

రాష్ట్రంలో విద్యుత్ సమస్య తీవ్రంగా ఉందని, గ్యాస్ కొరత వల్లే ఈ ఇబ్బంది ఏర్పడిందని ముఖ్యమంత్రి అన్నారు. విద్యుత్ కోత వల్ల పరిశ్రమలు కూడా ఇబ్బందులు ఎదుర్కొంటున్నాయని తెలిపారు. కామన్ ఫీజు వల్ల ప్రభుత్వంపై అదనపు భారం పడుతుందని కిరణ్‌కుమార్‌రెడ్డి చెప్పారు. జూబ్లీహాల్‌లో జరిగిన ఈ సమీక్షా సమావేశానికి ప్రభుత్వ ఉన్నతాధికారులు హాజరయ్యారు.

ఫీజు రీయింబర్స్‌మెంట్‌పై ముఖ్యమంత్రి కిరణ్‌కుమార్ రెడ్డి ఉన్నత స్థాయి కమిటీని నియమించారు. ఉన్నతవిద్యాశాఖ చైర్మన్ జయప్రకాశ్ నేతృత్వంలో ఈ కమిటీ కొనసాగనుంది. కేసిరెడ్డి, రేమండ్‌పీటర్, సాంబశివరావు, గోపాల్, రామ కృష్టయ్య, తులసీరామ్‌దాస్, ఉదయ్‌లను కమిటీ సభ్యులుగా నియమించారు.

తెలుగు మ్యాట్రిమోనిలో మీకు నచ్చిన జీవిత భాగస్వామి ఎంపికలు - రిజిస్ట్రేషన్ ఉచితం!