భర్తతో కలిసి తాగింది, ఆ తర్వాత కత్తితో దాడి చేసింది

By Pratap

Published: Tuesday, February 19, 2013, 8:55 [IST]

వరంగల్: భర్త మెడపై కత్తితో భార్య దాడి చేసిన ఘటన వరగంల్ జిల్లా జంగిలిగొండ శివారు రోటిబండ తండాలో శనివారం అర్ధరా త్రి జరిగింది. ఆ సమయంలో భార్యాభర్తలిద్దరూ మద్యం సేవించి ఉన్నారు. మహబూబాబాద్ రూరల్ పోలీసుల కథనం ప్రకారం- జంగిలిగొండకు చెందిన పోతుగంటి రాంబాబు(మూగ), పద్మ దంపతులు గ్రామ శివారులోని రోటిబండ తండాలో నివాసముంటూ కార్పెంటర్ పని చేసుకుంటూ జీవనం కొనసాగిస్తున్నారు.

ఆ దంపతులకు ఓ కుమారుడు, కూతురు ఉన్నారు. కొంతకాలంగా భార్యాభర్తలు ఘర్షణ పడుతున్నారు. శనివారం రాత్రి ఇరువురూ కలిసి మద్యం సేవించారు. ఆపై ఉన్నట్టుండి గొడవ పడ్డారు. ఆక్రమంలో సహనం కోల్పోయిన భార్య పద్మ కత్తితో భర్తమెడపై తీవ్రంగా గాయపర్చింది.

ఇది చూసిన కుమారుడు ఏకాంతాచారి కేకలు వేయడంతో చుట్టుపక్కల వారు అక్కడికి చేరుకుని 108 వాహనం ద్వారా మహబూబాబాద్ ప్రభుత్వ ప్రాంతీయ ఆస్పత్రికి తరలించారు. విషయం తెలుసుకున్న రూరల్ సీఐ ఆస్పత్రికి చేరుకుని రాంబాబు ఆరోగ్య పరిస్థితిపై ఆరా తీశారు.

రాం బాబు పరిస్ధితి విషమంగా ఉండడంతో స్థానిక వైద్యులు ప్రాథమిక చికిత్స అనంతరం వరంగల్ ఎంజీఎంకు తరలించారు. దాంతో భార్య పద్మపై కేసు నమోదు చేసి దర్యాప్తు చేస్తున్నామని సిఐ ఆదివారంనాడు చెప్పారు.

Published On February 19, 2013