మంత్రివర్గ విస్తరణ ఉండకపోవచ్చు: జెసి దివాకర్ రెడ్డి

By Pratap

Published: Thursday, April 18, 2013, 8:39 [IST]

హైదరాబాద్: రాష్ట్రంలో ప్రస్తుతం నెలకొన్న రాజకీయ పరిణామాల నేపథ్యంలో మంత్రివర్గ విస్తరణ లేదా పునర్వ్యవస్థీకరణ ఉండకపోవచ్చని మాజీ మంత్రి, కాంగ్రెసు సీనియర్ శాసనసభ్యుడు జెసి దివాకరరెడ్డి అభిప్రాయపడ్డారు. మంత్రివర్గం ఏర్పాటు ముఖ్యమంత్రి విశేషాధికారమని చెప్పారు. జాతీయపార్టీకి చెందినవారిగా ముఖ్యమంత్రి ఢిల్లీకి వెళ్లడం సహజమని, దీనిని ప్రత్యేకంగా తీసుకోవాల్సిన అవసరం లేదని ఆయన బుధవారం మీడియా ప్రతినిధులతో అన్నారు.. జోడు పదవుల విషయంలో కొన్నిసార్లు మినహాయింపులు ఉండవచ్చని వివరించారు.

మంత్రులదే బాధ్యత...

పాలనాపరమైన నిర్ణయాల్లో జరిగిన తప్పొప్పులకు బాధ్యత మూమ్మాటికీ మంత్రులదేనని మాజీ మంత్రి పాలడుగు వెంకట రావు అన్నారు. బుధవారం సీఎల్పీ కార్యాలయం వద్ద ఆయన మీడియా ప్రతినిధులతో మాట్లాడారు. ముఖ్యమంత్రి ఒత్తిడి మేరకే తాము నిర్ణయం తీసుకున్నామంటూ తప్పించుకోవడం లేదా కేబినెట్ సమష్టి బాధ్యతంటూ నెపం మరొకరిపై నెట్టేయడం సరికాదని ఆయన అన్నారు.

ఏదైనా పాలనాపరంగా నిర్ణయాన్ని తీసుకునే సమయంలో తప్పని సరిగా మంత్రి బాధ్యత వహించాల్సి ఉంటుందని అన్నారు. ఫలనా పనిచేయాలంటూ ముఖ్యమంత్రి ఒత్తిడి చేస్తే దానిని తిరస్కరించే అధికారం మంత్రికి ఉందని వివరించారు. అలా కాకుండా మంత్రిపదవిలో కొనసాగాలన్న కాంక్షతో ఫైళ్లపై సంతకాలు చేస్తే అందుకు మూల్యం కూడా చెల్లించాల్సి ఉంటుందని అన్నారు.

రాష్ట్రంలో ఇటు పార్టీ, అటు ప్రభుత్వంలో నెలకొన్న సమస్యలను స్థానికంగానే పరిష్కరించుకోవాల్సి ఉందని, దానికి అధిష్ఠానంపై నెపం వేయడం సమంజసం కాదని ఆయన అన్నారు. దీనికోసం ఢిల్లీ పెద్దలపై ఒత్తిడి చేయడం సరికాదన్నారు. సభాపతి, శాసనమండలి చైర్మన్, ముఖ్యమంత్రి, పిసిసి అధ్యక్షుడు వంటి ప్రధాన పదవులన్ని ఒకే ప్రాంతానికి చెందిన వారికి ఇవ్వడం వల్ల ప్రాంతీయ సమతూకం దెబ్బతిందని అన్నారు.

Published On April 18, 2013