విదర్భపై కన్నేసిన శరద్ పవార్: టిజెఎసిలో ఎన్సీపి

న్యూఢిల్లీ: మహారాష్ట్ర ఎన్నికల్లో కొత్త వ్యూహానికి కేంద్ర మంత్రి శరద్ పవార్ నేతృత్వంలోని ఎన్సీపి తెర తీసినట్లు కనిపిస్తోంది. వచ్చే ఎన్నికల్లో మహారాష్ట్రలో ప్రత్యేక విదర్భను ఎజెండాగా చేసుకునేందుకు ఎన్సీపి సమాయత్తమైనట్లు కనిపిస్తోంది. తెలంగాణ రాజకీయ జెఎసిలో ఎన్సీపి చేరడం ద్వారా ఆ సంకేతాలను ఇస్తోంది. తెలంగాణ రాష్ట్ర ఏర్పాటును డిమాండ్ చేస్తూ తెలంగాణ జెఎసి ఢిల్లీలోని జంతర్ మంతర్ వద్ద రెండు రోజుల ధర్నాను చేపట్టింది. ఆ ధర్నా సందర్భంగా ఎన్సిపీ తెలంగాణ జెఎసిలో చేరింది.

ప్రత్యేక తెలగాణ రాష్ట్ర ఏర్పాటు డిమాండ్‌ను శరద్ పవార్ ఇప్పటికే సమర్థించారు. టిజెఎసిలో చేరడం ద్వారా మరో అడుగు ముందుకేశారు. 2014 సాధారణ ఎన్నికల్లో మహారాష్ట్రలో ప్రత్యేక విదర్భను చర్చనీయాంశం చేయడానికి శరద్ పవార్ సిద్ధపడినట్లు అర్థమవుతోంది.

టిజెఎసి చైర్మన్ కోదండరామ్, ఇతర నాయకులతో ఎన్సీపి ప్రధాన కార్యదర్శి డిపి త్రిపాఠి సోమవారం సమావేశమయ్యారు. ప్రస్తుతం తెలంగాణ జెఎసిలో తెలంగాణ రాష్ట్ర సమితి (తెరాస), బిజెపి, న్యూడెమొక్రసీ పార్టీలు భాగస్వాములుగా ఉన్నాయి. ఎన్సిపీ కూడా చేరడంతో తెలంగాణ జెఎసి బలం పెరిగినట్లే. దాంతో దేశ రాజధానిలో తెలంగాణ నినాదం మరింత బలంగా వినిపించే అవకాశం ఏర్పడింది.

కాగా, తాము అధికారంలోకి వచ్చిన వంద రోజుల్లో తెలంగాణ రాష్ట్రాన్ని ఏర్పాటు చేస్తామని బిజెపి హామీ ఇచ్చింది. తెలంగాణ రాజకీయ జెఎసి ధర్నాకు బిజెపి పూర్తి మద్దతు ప్రకటించింది. మంగళవారం ఉమా భారతి తెలంగాణ జెఎసి నాయకుల దీక్షా శిబిరాని వచ్చి తన మద్దతు ప్రకటించారు. సిపిఐ ప్రధాన కార్యదర్శి సురవరం సుధాకర్ రెడ్డి కూడా దీక్షా స్థలికి వచ్చి మద్దతు ప్రకటించారు.

English summary

In a move that appears to be an endorsement of a separate Vidarbha state, the National Congress Party (NCP), a partner in the Congress-led UPA government at the Centre, became a constituent member of the Telangana Political Joint Action Committee (TJAC) which launched a two-day sit-in at Jantar Mantar in support of separate Telangana on Monday.