ఎన్నికల వేళ ఏపీ ప్రభుత్వం కీలక ప్రకటన..!!

ఏపీలో ఎన్నికల ముహూర్తం ఖరారైంది. షెడ్యూల్ ప్రకటనతో కోడ్ అమల్లోకి వచ్చింది. ప్రధాన పార్టీలు ఎన్నికలకు సమాయత్తం అవుతున్నాయి. ఈ సమయంలోనే ప్రభుత్వం షెడ్యూల్ కు ముందుగా కొన్ని కీలక నిర్ణయాలు తీసుకుంది. ఉద్యోగులకు డీఏ, అమరావతిలో సచివాలయ ఉద్యోగులకు ఇంటి స్థలాల పైన జీవోలు జారీ చేసింది. ఇదే క్రమంలో తాజాగా 2023-24 రబీ సీజన్‌ కింద 87 కరువు మండలాలను ప్రకటించింది.

ఎన్నికల సమయంలో ఏపీ ప్రభుత్వం ఏపీలో కరువు మండలాలను ప్రకటించింది. 2023 ఖరీఫ్‌లో 448 మండలాల్లో తీవ్ర వర్షాభావం ఏర్పడగా, 103 కరువు మండలాలు ప్రకటించిన జగన్‌ సర్కారు.. తాజాగా 2023-24 రబీ సీజన్‌ కింద 87 కరువు మండలాలను ప్రకటించింది. ఈశాన్య రుతుపవనాలు బలహీనంగా ఉండటం వల్ల తీవ్ర వర్షాభావం నెలకొన్న ఆరు జిల్లాల్లోని 87 మండలాలతో కరువు ప్రభావిత మండలాల జాబితాను కోడ్‌ అమలులోకి వచ్చేముందు విడుదల చేసింది. నెల్లూరు, కర్నూలు, నంద్యాల, అనంతపురం, శ్రీసత్యసాయి, ప్రకాశం జిల్లాల్లో 63 తీవ్రమైన కరువు మండలాలుగా, 24 ఒక మోస్తరు కరువు మండలాలుగా గుర్తించింది.

నోటిఫై చేసే కరువు మండలాల్లో మున్సిపల్‌ పట్టణ ప్రాంతాలు, నీటి వనరులకు గ్యారెంటీ ఉన్న ప్రాంతాలను తొలగించి, నిర్దిష్ట ప్రాంతాలను గుర్తిస్తూ కలెక్టర్లు జిల్లా గెజిట్‌లు ప్రకటిస్తారని ఉత్తర్వుల్లో స్పష్టం చేసింది. కరువు పీడిత ప్రాంతాలుగా ప్రకటించని పట్టణ మండలాలను తాగునీటి అవసరాల కోసం కరువు మండలాలతో సమానంగా పరిగణించి, తక్షణ చర్యలు తీసుకుంటారని పేర్కొంది. ఈ మేరకు విపత్తుల నిర్వహణశాఖ ఉత్తర్వులు జారీ చేసింది.ఈశాన్య రుతుపవనాల కాలంలో రాష్ట్ర వ్యాప్తంగా 400.6 మి.మీ. వర్షపాతం నమోదు కావాల్సి ఉండగా, కనీసం 302.6మి.మీ. వాన పడాల్సి ఉంది. కానీ గత అక్టోబరు నుంచి ఈ నెల మొదటివారం వరకు కేవలం 232.7 మి.మీ. మాత్రమే కరిసినట్లుగా నమోదైంది.

English summary

AP Govt Announces 86 mandals as drought Effected areas with low rain faill in Rabi seson ahead Elections.