జగన్ కోటలో ఒకే ఒక్క ఓటు!.. ఏపీ ఎంపీటీసీ ఎన్నికల్లో చెత్త రికార్డ్ !!
ఎన్నికల్లో పోటీ చేసి గెలవాలంటే ప్రజల మద్దతు తప్పనిసరిగా కావాలి. అయితే కనీసం తమ కుటుంబ సభ్యులు, స్నేహితులైనా ఓటు వేస్తారనే నమ్మకంతో చాలామంది అభ్యర్ధులు ఎన్నికల బరిలోకి దిగుతుంటారు. కానీ ఓ అభ్యర్థికి మాత్రం ఈ అంచనాలన్నీ తలకిందులయ్యాయి. పోటీ చేసిన ఎన్నికల్లో ఆమెకు వచ్చిన ఓట్లు ఎన్నో తెలుసా? అక్షరాలా ఒక్కటే! అవును.. వందలు, వేల ఓట్లు కాదు.. కేవలం ఒకే ఒక్క ఓటు. ఆంధ్రప్రదేశ్‌లో వెలుగుచూసిన ఈ విచిత్ర ఎన్నికల ఫలితం ఇప్పుడు స్థానికంగా హాట్ టాపిక్‌గా మారింది.
ఏం జరిగిందంటే..?
కడప జిల్లా గోపవరం మండలం బ్రాహ్మణపల్లి ఎంపీటీసీ ఎన్నికల ఫలితాల్లో ఈ ఆసక్తికర ఘటన చోటుచేసుకుంది. స్వతంత్ర అభ్యర్థిగా బరిలోకి దిగిన చడా సువర్ణకు కేవలం ఒక్క ఓటు మాత్రమే పోలైంది. ఎన్నికల్లో గెలుపోటములు సహజమే అయినా.. పోటీ చేసిన అభ్యర్థికి ఇంత తక్కువ సంఖ్యలో ఓట్లు రావడం మాత్రం అందరినీ ఆశ్చర్యానికి గురిచేసింది. ముఖ్యంగా గ్రామస్థులు ఈ ఫలితంపై ఆసక్తిగా చర్చించుకుంటున్నారు.
టీడీపీకి భారీ మెజారిటీ.. వైసీపీకి రెండో స్థానం
ఇక ఇదే స్థానంలో తెలుగుదేశం పార్టీ అభ్యర్థి స్రవంతి విజయకేతనం ఎగురవేశారు. ఆమెకు 1,508 ఓట్లు పోలవగా, వైఎస్సార్‌సీపీ అభ్యర్థి వెంకటసుబ్బమ్మకు 1,037 ఓట్లు వచ్చాయి. దీంతో స్రవంతి 471 ఓట్ల ఆధిక్యంతో ఘన విజయం సాధించారు. మరోవైపు నోటాకు కూడా 27 ఓట్లు పోలయ్యాయి. ప్రధాన పార్టీల అభ్యర్థుల మధ్య పోటీ ఒకవైపు సాగితే.. స్వతంత్ర అభ్యర్థికి వచ్చిన ఒక్క ఓటు మాత్రం మరోవైపు ప్రత్యేక చర్చకు తెరలేపింది.
అయితే సువర్ణకు ఒక్క ఓటు మాత్రమే రావడంతో ఇప్పుడు అందరి మదిలో ఒకటే ప్రశ్న. అసలు ఆ ఒక్క ఓటు ఎవరు వేశారు? ఆమెకు కుటుంబ సభ్యులు కూడా ఓటు వేయలేదా? బంధువులు, స్నేహితులు, పరిచయస్తుల నుంచి కూడా మద్దతు లభించలేదా? అంటూ గ్రామస్థులు ఆశ్చర్యం వ్యక్తం చేస్తున్నట్లు సమాచారం. అయితే ఆ ఒక్క ఓటు ఎవరిదన్నది మాత్రం స్పష్టంగా తెలియదు. ఓటరు రహస్యాన్ని గౌరవించాల్సి ఉండటంతో దీనిపై ఎలాంటి నిర్ధారణ లేని వ్యాఖ్యలు చేయలేం.
గెలుపు రాకపోయినా.. ఫలితాల్లో ప్రత్యేక గుర్తింపు!
సాధారణంగా ఎన్నికల ఫలితాల్లో విజేతకు వచ్చిన మెజారిటీ, ప్రత్యర్థుల మధ్య ఓట్ల తేడా, పార్టీల బలాబలాలే ఎక్కువగా చర్చకు వస్తుంటాయి. కానీ బ్రాహ్మణపల్లి ఫలితాల్లో మాత్రం అందరి దృష్టి ఒక్క ఓటుపైనే నిలిచింది. భారీ మెజారిటీతో టీడీపీ అభ్యర్థి విజయం సాధించినా, స్వతంత్ర అభ్యర్థికి వచ్చిన ఒక్క ఓటు మాత్రం ఈ ఎన్నికల ఫలితాల్లో ప్రత్యేకంగా నిలిచిపోయింది. ప్రజాస్వామ్యంలో ఎన్నికల్లో పోటీ చేయడం ఒక హక్కు. గెలుపు ఓటములు ప్రజల తీర్పుపై ఆధారపడి ఉంటాయి. ఒక్క ఓటు కూడా విలువైనదే. అయితే పోటీ చేసిన అభ్యర్థికి కేవలం ఒక్క ఓటు మాత్రమే రావడం మాత్రం అరుదైన పరిణామంగా చర్చకు దారితీసింది. ఎన్నికల ఫలితాల్లో గెలిచిన వారి సంబరాల మధ్య.. ఈ ఒక్క ఓటు కథ మాత్రం అందరినీ ఆశ్చర్యపరుస్తోంది.
Click it and Unblock the Notifications
Sign in with Google
