వాతావరణంలో కీలక మార్పులు, ఈ జిల్లాల్లో పిడుగులు పడే అవకాశం!

రాష్ట్రంలో ఎండల తీవ్రత పతాక స్థాయికి చేరింది. బుధవారం పార్వతీపురం మన్యం జిల్లా సాలూరులో 41.8 డిగ్రీలు, ఏలూరు జిల్లా కుక్కునూరులో 41.6 డిగ్రీల గరిష్ఠ ఉష్ణోగ్రతలు నమోదు కాగా, శ్రీకాకుళం జిల్లాలో వడదెబ్బకు గురై ఇద్దరు వ్యక్తులు మృతి చెందడం ఆందోళన కలిగిస్తోంది.

అయితే నేడు ఉత్తర కోస్తా, ఉమ్మడి గోదావరి, కృష్ణా, గుంటూరు జిల్లాల్లోని కొన్ని ప్రాంతాలలో ఉష్ణోగ్రతలు ఏకంగా 45 నుండి 46 డిగ్రీల వరకు నమోదయ్యే అవకాశం ఉందని రాష్ట్ర విపత్తుల నిర్వహణ సంస్థ హెచ్చరించింది. రాబోయే మూడు రోజుల పాటు గరిష్ట ఉష్ణోగ్రతలలో పెద్దగా మార్పు ఉండదని, ఆ తర్వాతే 2-3 డిగ్రీల వరకు తగ్గుముఖం పట్టే అవకాశం ఉందని అమరావతి వాతావరణ కేంద్రం తెలిపింది.

విస్తరిస్తున్న రుతుపవనాలు.. కొనసాగుతున్న ద్రోణి

మరోవైపు, ఎండల తీవ్రత ఇలా ఉంటే.. వాతావరణంలో కీలక మార్పులు చోటుచేసుకుంటున్నాయి. నైరుతి రుతుపవనాలు అరేబియా సముద్రం, లక్షద్వీప్, బంగాళాఖాతంలోని మరికొన్ని ప్రాంతాలకు వేగంగా విస్తరించాయి. రాబోయే 2-3 రోజుల్లో ఇవి మరింత ముందుకు సాగడానికి పరిస్థితులు అనుకూలంగా ఉన్నాయి. దీనికి తోడు, ఉత్తర తమిళనాడు పరిసర ప్రాంతాలపై ఉపరితల ఆవర్తనం కొనసాగుతోంది. అటు దక్షిణ బీహార్ నుండి జార్ఖండ్, ఛత్తీస్‌గఢ్‌ల మీదుగా దక్షిణ తెలంగాణ వరకు సముద్ర మట్టానికి 1.5 కి.మీ ఎత్తులో ద్రోణి విస్తరించి ఉంది.

ప్రాంతాల వారీగా వాతావరణ సూచనలు:

ఉత్తర కోస్తా ఆంధ్రప్రదేశ్ & యానాం:

రాబోయే మూడు రోజులు వడగాలులు వీచే ప్రమాదం ఉంది. ఉరుములు, మెరుపులతో కూడిన తేలికపాటి నుండి మోస్తరు వర్షాలు ఒకటి లేదా రెండు చోట్ల కురిసే అవకాశం ఉంది. గంటకు 50-60 కి.మీ వేగంతో బలమైన ఈదురు గాలులు వీస్తాయి. తీవ్రమైన వేడి, తేమతో కూడిన అసౌకర్య వాతావరణం ఉంటుంది.

దక్షిణ కోస్తా ఆంధ్రప్రదేశ్:

కొన్ని ప్రాంతాల్లో తేలికపాటి నుండి మోస్తరు వర్షాలు పడవచ్చు. అయితే రాబోయే రెండు రోజులు ఒకటి లేదా రెండు చోట్ల వడగాలులు వీచే అవకాశం ఉంది. ఇక్కడ కూడా గంటకు 50-60 కి.మీ వేగంతో బలమైన గాలులు వీస్తాయి.

రాయలసీమ:

కొన్ని చోట్ల ఉరుములు, మెరుపులతో కూడిన జల్లులు పడే అవకాశం ఉంది. గంటకు 50-60 కి.మీ వేగంతో బలమైన గాలులు వీస్తాయి.

పిడుగుల హెచ్చరిక.. ప్రజలు అప్రమత్తంగా ఉండాలి!

ఈ వాతావరణ పరిస్థితుల ప్రభావంతో గురువారం బాపట్ల, మార్కాపురం, ప్రకాశం, అనంతపురం, శ్రీసత్యసాయి, వైఎస్సార్‌ కడప, అన్నమయ్య, చిత్తూరు, అల్లూరి సీతారామరాజు, పోలవరం, విశాఖపట్నం, గుంటూరు, పల్నాడు, నెల్లూరు, కర్నూలు, నంద్యాల, తిరుపతి జిల్లాల్లో పిడుగులతో కూడిన తేలికపాటి వర్షాలు కురిసే అవకాశం ఉందని విపత్తుల నిర్వహణ సంస్థ తెలిపింది. ఉరుములు, మెరుపులు వచ్చే సమయంలో ప్రజలు చెట్ల కింద, బహిరంగ ప్రదేశాల్లో ఉండరాదని, ఎండ తీవ్రత దృష్ట్యా మధ్యాహ్నం వేళల్లో జాగ్రత్తలు వహించాలని అధికారులు సూచించారు.

English summary

AP Weather Update: IMD issues a severe 46°C heatwave alert for Andhra Pradesh. Southwest Monsoon advances, bringing sudden thunderstorms, 60kmph winds, and lightning warnings for the next 3 days.