APPSC: ఏపీపీఎస్సీ మూడు నోటిఫికేషన్లు- 3 శాఖల్లో ఉద్యోగాలివే..!

ఆంధ్రప్రదేశ్ పబ్లిక్ సర్వీస్ కమిషన్ నిరుద్యోగులకు మరో శుభవార్త చెప్పింది. మూడు ప్రభుత్వ విభాగాల్లో ఉద్యోగాల భర్తీ కోసం మూడు వేర్వేరు నోటిఫికేషన్లను విడుదల చేసింది. దీంతో ఎప్పటి నుంచో ఈ ఉద్యోగాల కోసం ఎదురుచూస్తున్న నిరుద్యోగులు సంతోషం వ్యక్తం చేస్తున్నారు. ఆయా నోటిఫికేషన్లలో ఈ ఉద్యోగాలకు ఎప్పటిలోగా దరఖాస్తు చేసుకోవాలి, ఎన్ని ఉద్యోగాలు ఉన్నాయి, ఇతర వివరాలు ఉన్నాయి.

ఇవాళ ఏపీపీఎస్సీ విడుదల చేసిన 3 నోటిఫికేషన్లలో ఒకటి వ్యవసాయ శాఖలో 10 అగ్రికల్చర్ ఆఫీసర్ ఉద్యోగాల నియామకానికి కాగా.. మరొకటి దేవాదాయ శాఖలో 7 ఎగ్జిక్యూటివ్ ఆఫీసర్ ఉద్యోగాల భర్తీకి నోటిఫికేషన్, ఇంకొకటి భూగర్భ జల శాఖలో 4 టెక్నికల్ అసిస్టెంట్ ఉద్యోగాలకు ఉంది. ఈ మూడు కేటగిరీల ఉద్యోగాలకు దరఖాస్తు చేసుకునే తేదీలు, ఇతర వివరాలను కూడా ఏపీపీఎస్సీ ప్రకటించింది.

వ్యవసాయశాఖలో అగ్రికల్చర్ ఆఫీసర్ ఉద్యోగాలకు దరఖాస్తు చేసుకునేందుకు ఈ నెల 19 నుంచి సెప్టెంబర్ 8 వరకు గడువు ఇచ్చారు. అలాగే దేవాదాయశాఖలో ఎగ్జిక్యూటివ్ ఆఫీసర్ ఉద్యోగాలకు దరఖాస్తు చేసుకునేందుకు ఈ నెల 13 నుంచి సెప్టెంబర్ 2 వరకు గడువు ఇచ్చారు. అలాగే భూగర్భజల శాఖలో టెక్నికల్ అసిస్టెంట్ ఉద్యోగాలకు దరఖాస్తు చేసుకునేందుకు కూడా ఈ నెల 13 నుంచి సెప్టెంబర్ 2 వరకు సమయం ఇచ్చారు. అన్ని ఉద్యోగాలకూ ఆన్ లైన్ లో దరఖాస్తులు స్వీకరిస్తారు. ఇందుకోసం అభ్యర్ధులు ఏపీపీఎస్సీ వెబ్ సైట్ లోకి వెళ్లి నోటిఫికేషన్లను పరిశీలించి దరఖాస్తు చేసుకోవచ్చని ఏపీపీఎస్సీ కార్యదర్శి పి.రాజబాబు వెల్లడించారు.