బేరసారాల కోసమే కెసిఆర్ భారీర్యాలీ: విలీనంపై అరవింద్

By Srinivas

Updated: Thursday, February 27, 2014, 13:21 [IST]

హైదరాబాద్: తెలంగాణ రాష్ట్ర సమితి అధ్యక్షులు కల్వకుంట్ల చంద్రశేఖర రావు ఎలాంటి షరతులు లేకుండా తన పార్టీని తెలంగాణ ఇచ్చిన కాంగ్రెసు పార్టీలో విలీనం చేయాలని, బేరసారాల కోసమే బుధవారం ఆయన భారీ ర్యాలీని నిర్వహించారని అదిలాబాద్ జిల్లా మంచిర్యాల ఎమ్మెల్యే అరవింద్ రెడ్డి గురువారం అన్నారు.

తెలంగాణ వచ్చాక దళితుడిని ముఖ్యమంత్రిని చేస్తానని చెప్పిన కెసిఆర్... ఏఐసిసి అధ్యక్షురాలు సోనియా గాంధీ వద్దకు ఒక్క దళితుడిని తీసుకు వెళ్లలేదని విమర్శించారు. తెలంగాణ ఇచ్చిన కాంగ్రెసు పార్టీలో కెసిఆర్ తన పార్టీని బేషరతుగా విలీనం చేయాలన్నారు. తెరాస పుట్టిందే తెలంగాణ కోసమని, ఆ కల నెరవేరిందన్నారు.

ఏ ఆలోచన లేకుండా, ఎలాంటి చర్యలు లేకుండానే విలీనం చేయాలని డిమాండ్ చేశారు. మాట తప్పి విలీనం చేయకుంటే ప్రజలు ఆయనను నమ్మరన్నారు. కెసిఆర్ కుటుంబ సభ్యులతో వెళ్లి సోనియాతో ఫోటో దిగారని విమర్శించారు. తన తెరాస మిత్రులు కెసిఆర్‌ను నమ్మి మోసపోవద్దన్నారు.

తెలంగాణ ఇచ్చిన కాంగ్రెసు పార్టీకి తెలంగాణ ప్రజలు రుణపడి ఉంటారన్నారు. బేరసారాల కోసమే భారీ ర్యాలీని తీశారన్నారు. తన కుటుంబానికి మేలు జరగాలని కెసిఆర్ ఈశిస్తున్నారన్నారు. తెలంగాణలో కాంగ్రెసుదే పై చేయి అని, పదిహేడు లోకసభ స్థానాల్లో గెలిచి కాంగ్రెసు రుణం తీర్చుకోవాలన్నారు.

కాంగ్రెసుదే అధికారం: దానం

కాంగ్రెసు పార్టీలో తెలంగాణ రాష్ట్ర సమితి విలీనం అయినా కాకున్నా, పొత్తు పెట్టుకున్నా లేకున్నా తమ పార్టీ అధికారంలోకి రావడం ఖాయమని మంత్రి దానం నాగేందర్ వేరుగా అన్నారు.