అంబటి కారుపై టీడీపీ దాడి, ఎమ్మెల్యేకు గాయాలు

హైదరాబాద్: వైయస్సార్ కాంగ్రెసు పార్టీ సీనియర్ నేత అంబటి రాంబాబు కారు పైన దాడి జరిగింది. గుంటూరు జిల్లా మేడికొండూరు సమీపంలో ఎమ్మెల్యే ముస్తఫాతో పాటు ప్రయాణిస్తున్న అంబటి కారుపై టీడీపీ కార్యకర్తలు దాడి చేశారని వైయస్సార్ కాంగ్రెసు పార్టీ ఆరోపిస్తోంది.

ముప్పాళ్ల ఎంపీపీ ఎన్నికకు వెళుతుండగా ఈ దాడి జరిగింది. ఈ దాడిలో అంబటి రాంబాబు, ముస్తఫాలకు స్వల్ప గాయాలయ్యాయని సమాచారం. వారు ప్రయాణిస్తున్న కారు అద్దాలు ధ్వంసమయ్యాయి. దీంతో ప్రస్తుతం మేడికొండూరులో ఉద్రిక్తత నెలకొంది.

ఈ సమయంలో వైయస్సార్ కాంగ్రెసు పార్టీ ఎంపీటీసీ సభ్యుల పైన కూడా దాడి జరిగింది. ఇవాళ ముప్పాళ్ల ఎంపీపీ ఎన్నిక జరగనుంది. ఈ నేపథ్యంలో ఎంపీటీసీ సభ్యులు శిబిరం నుండి ముప్పాళ్ల బయలుదేరారు.

మార్గమధ్యలో మేడికొండూరు వద్దకు రాగానే ప్రత్యర్థులు వీరు ప్రయాణిస్తున్న వాహనం పైన దాడి చేశారు. ఈ దాడి తెలుగుదేశం వారే చేశారని వైయస్సార్ కాంగ్రెసు పార్టీ ఆరోపిస్తోంది.

English summary

Attack on YSR Congress Party senior leader Ambati Rambabu's car.