మానసిక ఆందోళన వల్లే, బొత్స బాగున్నారు: చిరు

By Pratap

Published: Tuesday, December 3, 2013, 21:37 [IST]

హైదరాబాద్: మానసిక ఆందోళన వల్లనే పిసిసి అధ్యక్షుడు బొత్స సత్యనారాయణ అస్వస్థతకు గురయ్యారని కేంద్ర మంత్రి చిరంజీవి చెప్పారు. అస్వస్థతతో బొత్స సత్యనారాయణ మంగళవారం సాయంత్రం కేర్ ఆస్పత్రిలో చేరారు. బొత్సతో తాను మాట్లాడానని, సంతోషంగా ఉన్నారని చిరంజీవి చెప్పారు. బొత్స ఆరోగ్యం నిలకడగా ఉందని ఆయన చెప్పారు. బొత్సకు కొంత విశ్రాంతి అవసరమని వైద్యులు చెప్పినట్లు ఆయన తెలిపారు.

బొత్స సత్యనారాయణ ఆరోగ్యం నిలకడగా ఉందని కేర్ ఆస్పత్రి వర్గాలు చెప్పాయి. బొత్స తీవ్రమైన రక్తంపోటు, తలనొప్పితో బాధపడుతున్నట్లు తెలిపాయి. గుండె నరాల వైద్య నిపుణుల పర్యవేక్షణలో బొత్సకు చికిత్స జరుగుతున్నట్లు సమాచారం. బొత్స ఆరోగ్యంపై కేర్ ఆస్పత్రి వైద్యులు బులిటెన్ విడుదల చేశారు.

డాక్టర్ సోమరాజు ఆధ్వర్యంలో ఆయనకు చికిత్స అందిస్తున్నారు. మంత్రులు, శాసనసభ్యులు, కాంగ్రెసు నాయకులు ఆయనను పరామర్శించారు. అస్వస్థత కారణంగా ఆయన మంగళవారం సాయంత్రం ఏర్పాటైన మంత్రి వర్గసమావేశానికి హాజరు కాలేకపోయారు. బొత్స ఆరోగ్యంపై పార్టీ శ్రేణులు ఆందోళన చెందాల్సిన అవసరం లేదని కాంగ్రెసు నాయకులు చెప్పారు.

మంత్రివర్గ సమావేశం ముగిసిన తర్వాత ముఖ్యమంత్రి కిరణ్ కుమార్ రెడ్డి కేర్ ఆస్పత్రికి వచ్చి బొత్స సత్యనారాయణను పరామర్శించారు. బొత్స అస్వస్థతకు గురయ్యారని తెలియగానే తెలంగాణ రాష్ట్ర సమితి (తెరాస) నేత కె. కేశవరావు, శాసనసభ్యుడు నాగేశ్వర రావు, మంత్రులు దానం నాగేందర్, కన్నా లక్ష్మినారాయణ తదితరులు కేర్ ఆస్పత్రికి వచ్చారు.

Published On December 3, 2013