సీమాంద్రలో బాబు రెండో దఫా ఆత్మ గౌరవయాత్ర

హైదరాబాద్: తెలుగుదేశం పార్టీ అధ్యక్షుడు నారా చంద్రబాబు నాయుడు రెండవ దశ తెలుగువారి ఆత్మ గౌరవ యాత్రను చేపట్టనున్నారు. నవంబర్ ఐదో తేదీ నుంచి మళ్లీ ప్రజల్లోకి విస్తృతంగా వెళ్లడానికి ఆయన కార్యక్రమం రూపొందించుకొంటున్నారు. దీపావళి తర్వాత పర్యటన మొదలుపెట్టి వీలైనన్ని జిల్లాలు పర్యటించేలా ఈ కార్యక్రమం ఉంటుందని పార్టీ వర్గాలు తెలిపాయి.

గతంలో ఆయన పది రోజులపాటు గుంటూరు, కృష్ణా జిల్లాల్లో పర్యటించారు. ఆ తర్వాత మరికొన్ని జిల్లాల్లో పర్యటించాలనుకున్నారు. కానీ వివిధ రాజకీయ పరిణామాల కారణంగా వాయిదా పడింది. ఈ మధ్యలో ఆయన ఢిల్లీలో ఆమరణ నిరాహార దీక్ష కూడా చేశారు.

తన పర్యటన మొదలు పెట్టేలోపు అన్ని జిల్లాలు, నియోజకవర్గాల్లో పార్టీ సమావేశాలు పెట్టి పార్టీ యంత్రాంగాన్ని కదిలించాలని, తన యాత్రకు సమాంతరంగా అన్ని నియోజకవర్గాల్లో కూడా పార్టీ నేతల పర్యటనలు ఉండేలా చూడాలని ఆయన భావిస్తున్నారు.

రాష్ట్ర విభజన తీరును వ్యతిరేకిస్తూ చంద్రబాబు తెలుగువారి ఆత్మగౌరవ యాత్రను చేపట్టనున్నారు. రాష్ట్ర విభజన విషయంలో కాంగ్రెసు పార్టీ కుట్ర చేసిందని, తెలంగాణలో తెలంగాణ రాష్ట్ర సమితితోనూ సీమాంధ్రలో వైయస్ జగన్ నాయకత్వంలోని వైయస్సార్ కాంగ్రెసు పార్టీతోనూ కుమ్మక్కయ్యిందని చెప్పడానికి ఆయన ఈ యాత్ర చేపడుతున్నారు.

English summary

Telugudesam party president Nara Chandrababu Naidu has decided to tour Seemandhra district from November 5.