పరిటాల: బాబుపై చిరంజీవి, కాంగ్రెస్‌లోకి టిడిపి ఎమ్మెల్యే

By Srinivas

Updated: Thursday, March 27, 2014, 14:41 [IST]

అనంతపురం/న్యూఢిల్లీ: దివంగత పరిటాల రవీంద్ర హత్య కేసులో ఆరోపణలను ఎదుర్కొంటున్న వారిని తెలుగుదేశం పార్టీలో ఎలా చేర్చుకుంటారని కేంద్ర పర్యాటక శాఖ మంత్రి, సీమాంధ్ర కాంగ్రెసు పార్టీ ప్రచార సారథి చిరంజీవి ప్రశ్నించారు. గురువారం సీమాంధ్ర కాంగ్రెసు నేతల బస్సుయాత్ర అనంతపురం జిల్లాలో కొనసాగుతోంది. ఈ సందర్భంగా చిరంజీవి మాట్లాడారు.

కాంగ్రెసు పార్టీని కొందరు నేతలు మోసం చేశారన్నారు. చంద్రబాబు బిజెపితో పొత్తుకు సిద్ధమవుతున్నారని, ఆయనను నమ్మి మైనార్టీలు మోసపోవద్దన్నారు. విభజన విషయంలో కేవలం కాంగ్రెసు పార్టీని మాత్రమే తప్పు పట్టడం సరికాదన్నారు. టిడిపి తెలంగాణకు అనుకూలంగా లేఖ ఇచ్చిందని, వైయస్సార్ కాంగ్రెసు పార్టీ ఆర్టికల్ 3 ప్రకారం విభజన చేయాలని చెప్పిందని, తాము అధికారంలోకి వస్తే తెలంగాణ ఇస్తామని బిజెపి చెప్పిందని.. ఇలా అన్ని పార్టీలు చెప్పాకే కాంగ్రెసు పార్టీ నిర్ణయం తీసుకుందన్నారు.

విభజన విషయంలో కాంగ్రెసును తప్పుపట్ట వద్దన్నారు. కాంగ్రెసు పార్టీ నాయకులను చంద్రబాబు తమ పార్టీలో ఎలా చేర్చుకుంటున్నారన్నారు. అప్పుడు అవినీతిపరులుగా కనిపించిన నేతలు.. ఇప్పుడు తమ పార్టీలో చేరగానే నిజాయితీపరులు అవుతారా అన్నారు.

కాంగ్రెసులోకి సుద్దాల దేవయ్య

కరీంనగర్ జిల్లా చొప్పదండి తెలుగుదేశం పార్టీ ఎమ్మెల్యే సుద్దాల దేవయ్య కాంగ్రెస్‌లో చేరారు. ఢిల్లీలో దిగ్విజయ్ సింగ్, తెలంగాణ పిసిసి అధ్యక్షులు పొన్నాల లక్ష్మయ్య సమక్షంలో ఆయన కాంగ్రెస్ తీర్థం పుచ్చుకున్నారు.