టిడిపి కార్యాలయానికి డిఎల్: అభ్యర్థుల కసరత్తు

By Pratap

Published: Tuesday, March 18, 2014, 13:02 [IST]

కడప: కడప జిల్లా మైదుకూరు శాసనసభ్యుడు, మాజీ మంత్రి డీఎల్ రవీంద్రా రెడ్డి మంగళవారంనాడు మైదుకూరు తెలుగుదేశం పార్టీ కార్యాలయానికి చేరుకున్నారు. ఆయన కాంగ్రెస్ పార్టీని వీడి తెలుగుదేశం పార్టీలో చేరుతారంటూ గత రెండు రోజులుగా జోరుగా ఊహాగానాలు చెలరేగుతున్న విషయం తెలిసిందే. ఈ నేపథ్యంలో ఆయన మైదుకూరు టిడిపి కార్యాలయానికి వెళ్లారు. మున్సిపల్ అభ్యర్థుల ఎంపిక ప్రక్రియలో డీఎల్ పాల్గొన్నారు. డీఎల్ త్వరలో టిడిపిలో చేరనున్నట్లు తెలుస్తోంది.

తెలుగుదేశం పార్టీలో చేరే విషయంపై ఆయన సోమవారం మాట్లాడారు. వైయస్సార్ కాంగ్రెసు పార్టీ అధినేత జగన్ మోహన్ రెడ్డి ఓ సైకో అని, అలాంటి వారికి చెక్ పెట్టాలంటే టిడిపి అధినేత చంద్రబాబు నాయుడుకు మద్దతివ్వాలని ఆయన అన్నారు. అపుడే సీమాంధ్రను స్వర్ణాంధ్ర ప్రదేశ్‌గా మార్చుకోగలమన్నారు.

వచ్చే ఎన్నికల్లో తెలుగుదేశం పార్టీ అభ్యర్థులను గెలిపించాలని ఆయన పిలుపునిచ్చారు. తమ నియోజకవర్గంలోని 15 ఎంపిటిసి స్థానాలకు గాను 13 స్థానాలను గెలుచుకుని కార్యర్తలు సత్తాచాటాలని అన్నారు. స్థానిక సంస్థల ఎన్నికల్లో అనుసరించాల్సిన వ్యూహాన్ని అనుచరులు, కార్యకర్తలతో చర్చించారు.

అంతేకాకుండా తాను తెలుగుదేశం పార్టీలో చేరే విషయంపై నాలుగైదు రోజుల్లో స్పష్టత ఇస్తానని డిఎల్ చెప్పారు. ఇదే అంశంపై స్థానిక నేతలు, కార్యకర్తలతో సమావేశం నిర్వహించనున్నట్టు తెలిపారు.

Published On March 18, 2014