పిక్చర్స్: కలబడ్డారు, ధర్నాలో మహిళలు ఏడ్చారు

By Pratap

Published: Friday, January 3, 2014, 10:40 [IST]

రాజమండ్రి: తూర్పు గోదావరి జిల్లా రాజమండ్రిలో ఇందిరమ్మ ఇళ్ల కేటాయింపులో తెలుగుదేశం, కాంగ్రెసు పార్టీ నాయకులు, కార్యకర్తలు బాహాబాహీకి దిగారు. రాజమండ్రి అర్బన్ కాంగ్రెస్ శాసనసభ్యుడు రౌతు సూర్యప్రకాశరావు, తెలుగుదేశం నేత గోరంట్ల బుచ్చయ్యచౌదరి పరస్పరం కలబడ్డారు. గోరంట్లతోపాటు ఇతర తెలుగుదేశం నేతలకు, లబ్ధిదారులకు స్వల్పగాయాలయ్యాయి.

రాజమండ్రిలో ఇందిరమ్మ పథకం కింద 2008 లో 2,556 వాంబే గృహాలను నిర్మించగా గురువారం జిల్లా హౌసింగ్ అధికారులు లాటరీ పద్ధతిలో ఇళ్ల కేటాయింపునకు లబ్ధిదారులను పిలిచారు. ఈ సందర్భంలో రాజమండ్రి ఎమ్మెల్యే రౌతు మాట్లాడుతుండగా - తెలుగుదేశం పార్టీ నేత బుచ్చయ్యచౌదరి అక్కడికి వచ్చి రూరల్ ఎమ్మెల్యే చందన రమేష్‌కు చెప్పకుండా ఎందుకు ఈ కార్యక్రమం చేస్తున్నారని ప్రశ్నించారు.

అనర్హులకు లబ్ధి చేకూర్చుతున్నారని గోరంట్ల ఆరోపించగా వారిద్దరి మధ్య వాగ్వాదం జరిగింది. తాను ముఖ్యమంత్రిని కోరడం వల్లే ఇళ్లు మంజూరయ్యాయని తనకు తెలియజేయకుండా అర్బన్ ఎమ్మెల్యేను తీసుకురావడం అన్యాయమని ఎమ్మెల్యే చందన రమేష్ అన్నారు.

మొదట ప్రశాంతమే..

ఇందిరమ్మ ఇళ్ల కేటాయింపు కార్యక్రమంలో మొదట ఇలా మామూలుగానే ఉంది. లాటరీ పద్ధతిలో ఇళ్ల కేటాయింపునకు లబ్ధిదారులను అధికారులు పిలిచారు.

బాహాబాహీకి దిగారు..

ఇళ్ల కేటాయింంపు సందర్భంగా తెలుగుదేశం నాయకుడు బుచ్చయ్య చౌదరి అక్కడికి వచ్చి ఎవరికీ చెప్పకుండా కార్యక్రమం నిర్వహిస్తున్నారని విమర్శించడంతో వాతావరణం వేడెక్కింది.

ఎమ్మెల్యే రౌతు విమర్శ..

తాను పేదల కోసం ఇళ్లను కేటాయిస్తుంటే అడ్డుకుంటున్నారని రౌతు అనండంతో కాంగ్రెస్ కార్యకర్తలు, మహిళలు గోరంట్లపై చెప్పులు, రాళ్లు విసిరారు. దీంతో గోరంట్లతోపాటు కొందరు లబ్ధిదారులకు గాయాలయ్యాయి.