అనినాశ్ కు ఊహించని పరాభవం..!!

వైసీపీ నేత దేవినేని అవినాశ్ కు చేదు అనుభవం ఎదురైంది. అవినాశ్ పైన టీడీపీ కార్యాలయంపై దాడి కేసు నమోదైంది. ఆయన పైన లుకౌట్ నోటీసులు జారీ అయ్యాయి. అవినాశ్ తాజాగా శంషాబాద్ విమానాశ్రయం నుంచి దుబాయ్ వెళ్లేందుకు సిద్దమయ్యారు. విమానాశ్రయ అధికారులు ఏపీ పోలీసులకు సమాచారం ఇచ్చారు. పోలీసుల సూచనతో అవినాశ్ విదేశీ పర్యటనకు విమానాశ్రయ అధికారులు నిరాకరించారు.

అవినాశ్ పై కేసు
టీడీపీ ప్రధాన కార్యాలయంపై దాడితో పాటు టీడీపీ నాయకుడు పట్టాభి ఇంటిపై జరిగి దాడి ఘటనల్లో దేవినేని అవినాష్‌పై కేసులు నమోదయ్యాయి. మంగళగిరి రూరల్‌ పోలీస్ స్టేషన్లో నమోదైన కేసులో అవినాష్‌ నిందితుడిగా ఉన్నారు. మూడేళ్ల క్రితం మంగళగిరిలోని టీడీపీ ప్రధాన కార్యాలయంలో జరిగిన విధ్వంసానికి అవినాష్‌ ప్రధాన నిందితుడు అనే ఆరోపణలు ఉన్నాయి. ఈ నేపథ్యంలో ఆయనపై కేసులు నమోదు చేశారు. తాజాగా ఆయన దుబాయ్‌ వెళ్లేందుకు ప్రయత్నించగా పోలీసులు అడ్డుకున్నారు.

దాడుల వెనుక
2021 అక్టోబరు 19న టీడీపీ కేంద్ర కార్యాలయంపై వైసీపీ అరాచకమూకలు దాడికి తెగబడ్డాయి. వైసీపీ రాష్ట్ర ప్రధానకార్యదర్శి, ఎమ్మెల్సీ లేళ్ల అప్పిరెడ్డి, స్థానిక ఎమ్మెల్యే ఆళ్ల రామ కృష్ణారెడ్డి, వైసీపీ యువ నాయకుడు దేవినేని అవినాష్‌ల ఆధ్వర్యం లో వారి అనుచరులే ఈ దాడికి పాల్పడినట్లు అప్పట్లో టీడీపీ శ్రేణులు ఆరోపించాయి. వైసీపీ విద్యార్థి విభాగం రాష్ట్ర నాయకుడు పానుగంటి చైతన్య ఆధ్వర్యంలో గుంటూరు నుంచి పెద్దసంఖ్యలో వైసీపీ మద్దతు దారులు దాడికి తెగబడ్డారని ఆరోపణలు వచ్చాయి.

విచారణ
ఈ కేసులో పలువురు నేతలు ఇప్పటికే ముందస్తు బెయిల్ కోసం కోర్టును ఆశ్రయించారు. కొందరిని పోలీసులు అదుపులోకి తీసుకున్నారు. కాగా, దేవినేని అవినాశ్ పైన ఈ కేసు నమోదై ఉంది. ఇప్పుడు అవినాశ్ విదేశాలకు వెళ్తున్న సమయంల లుకౌట్ నోటీసుల ద్వారా అడ్డుకున్నారు. అటు చంద్రబాబు ఇంటి పైన దాడి కేసులో మాజీ మంత్రి జోగి రమేష్ విచారణ ఎదుర్కొంటున్నారు. ఇప్పుడు ఈ కేసుల్లో ఎలాంటి పరిణామాలు చోటు చేసుకుంటాయనేది ఆసక్తి కరంగా మారుతోంది.

English summary

Police rejects permission for Devineni Avinash to fly for Dubai due to his involvement in TDP office Attack case.